საპროცედურო საკითხთა და იურიდიულმა კომიტეტებმა „ერთიანი ნაციონალური მოძრაობის“ თავმჯდომარის, ნიკა მელიას სადეპუტატო იმუნიტეტის შეჩერებას მხარი დაუჭირეს.
გაერთიანებული კომიტეტების სხდომაზე დეპუტატებმა მოისმინეს საპროკურორო ზედამხედველობის სამმართველოს უფროსის ამირან გულუაშვილის მოხსენება, დაუსვეს მას შეკითხვები, იმსჯელეს და საკითხის მხარდაჭერის გადაწყვეტილება მიიღეს.
საკითხს ლევან იოსელიანმა მხარი არ დაუჭირა.
კომიტეტების სხდომას ესწრებოდნენ „მოქალაქეების“ წარმომადგენლები, ასევე „სოციალ-დემოკრატების“ წარმომადგენელი დავით ზილფიმიანი, რომლებმაც განაცხადეს, რომ მელიასთვის მანდატის შეჩერებას არც კომიტეტზე და არც პლენარულზე მხარს არ დაუჭერენ.
ნიკა მელიასთვის უფლებამოსილების შეჩერების საკითხი საბოლოოდ კენჭის საყრელად პლენარულ სხდომაზე გავა.
ნიკა მელიას საქმე:
12 თებერვალს პროკურატურამ ნიკა მელიას აღმკვეთი ღონისძიების სახით – პატიმრობისთვის სასამართლოსთვის შუამდგომლობით მიმართვასთან დაკავშირებით, თანხმობის თაობაზე პარლამენტს მიმართა.
ნიკა მელია 20 ივნისის საქმეზეა ბრალდებული, ჯგუფური ძალადობის ხელმძღვანელობისა და მასში მონაწილეობის მუხლით. მას აღკვეთის ღონისძიებად შეფარდებული ჰქონდა გირაო და ასევე დაუწესდა ელექტრონული მონიტორინგი.
ნიკა მელიამ პირველ ჯერზე გირაოს თანხა შეიტანა. თუმცა, 1 ნოემბერს, აქციაზე პროტესტის ნიშნად დემონსტრაციულად მოიხსნა ელექტრონული სამაჯური. იმის გამო, რომ მან ამით დაარღვია მის მიმართ გამოყენებული აღკვეთის ღონისძიების პირობები, პროკურატურამ სასამართლოს აღკვეთის ღონისძიების გამკაცრების შუამდგომლობით მიმართა.
სასამართლომ გირაო გაამკაცრა და ის 40 000 ლარით, 70 000 ლარამდე გაიზარდა. გირაოს გაზრდილი ოდენობის გადახდის ვადად განისაზღვრა 50 დღე. სწორედ ამ გირაოს გადახდაზე განაცხადა უარი ნიკა მელიამ.
შესაბამისად, ბრალდების მხარემ 12 თებერვალს აღნიშნა, რომ კანონმდებლობით მას აქვს ვალდებულება, რომ ამ ჯერზე სასამართლოს კიდევ უფრო მკაცრი აღკვეთის ღონისძიების – პატიმრობის შუამდგომლობით მიმართოს. ამისთვის კი ნიკა მელიასთვის სადეპუტატო იმუნიტეტის შეჩერებაა საჭირო. როგორც ფრაქცია „ქართული ოცნების“ თავმჯდომარე მამუკა მდინარაძე აცხადებს, უმრავლესობა მხარს დაუჭერს მელიასთვის იმუნიტეტის მოხსნას.
