25 სექტემბერს საქართველოში კორონავირუსის 265 ახალი შემთხვევა დაფიქსირდა. Covid-19-ით გარდაიცვალა 27-ე პაციენტი, ხოლო გამოჯანმრთელდა კიდევ 54 პაციენტი.
თბილისის ინფექციური საავადმყოფოს ბოქსირებული განყოფილების ხელმძღვანელის, მარინა ენდელაძის ინფორმაციით, კორონავირუსის დღევანდელი შემთხვევები რეგიონებში შემდეგნაირად განაწილდა:
- აჭარა – 165;
- იმერეთი – 27;
- კახეთი – 6;
- თბილისი -43;
- სამეგრელო-ზემო სვანეთი – 6;
- სამცხე-ჯავახეთი -4;
- ქვემო ქართლი – 3;
- შიდა ქართლი – 2.
მარინა ენდელაძემ დილით ჟურნალისტებთან განაცხადა, რომ აქტიური საქმეებიდან 17 პაციენტი კრიტიკულად მძიმეა.
აჭარის ჯანდაცვის ინფორმაციით, კორონავირუსით გარდაცვლილი 27-ე პაციენტი, 54 წლის მამაკაცია. პაციენტი ბათუმის „რესპუბლიკურ კლინიკურ საავადმყოფოში“ 20 სექტემბერს შეიყვანეს.
„მამაკაცს აღენიშნებოდა სუნთქვის მწვავე უკმარისობა, ცხელება, ფილტვის 80%-ის დაზიანება. პოსტრეანიმაციული ღონისძიებების შემდეგ, პაციენტი მოთავსდა რეანიმაციულ განყოფილებაში. პაციენტის მდგომარეობა კლინიკაში შეყვანისთანავე შეფასდა რთულად“, – აღნიშნულია აჭარის ჯანდაცვის განცხადებაში.
დღეს ხულოს მერიის ორ თანამშრომელს კორონავირუსი დაუდასტურდა. ინფიცირებულები კლინიკაში, მათთან კავშირში მყოფი პირები კი, იზოლაციაში გადაიყვანეს.
ბათუმის რესპუბლიკური საავადმყოფოს დირექტორს სოლომონ ფუტკარაძეს კორონავირუსი დაუდასტურდა.
გურიაში 3 ადამიანს კორონავირუსი დაუდასტურდა. შემთხვევების ზრდის გამო, ოზურგეთის მუნიციპალიტეტის დაბა ლაითურში გუშინ გადაადგილება შეიზღუდა.
ოზურგეთში, კორონავირუსით ინფიცირებული პედაგოგი წესების დარღვევისთვის დააჯარიმეს.
ქუთაისის ლაბორატორიაში კორონავირუსზე 1 768 ბიოლოგიური ნიმუში გამოიკვლიეს და მათგან 27 პასუხი დადებითი აღმოჩნდა.
