კოალიცია „ღისეული შრომისთვის“ „საქართველოს რკინიგზაში“ დასაქმებული ორი ელექტრომონტიორის დაღუპვისა და ერთი ელექტრომონტიორის დაშავების ფაქტს ეხმაურება. განცხადებას ხელს აწერს 7 ორგანიზაცია.
„ქვეყანაში კვლავ პრობლემურია და მწვავედ დგას მომეტებული საფრთხის მქონე სამუშაო ადგილებზე, დასაქმებულთა შრომითი პირობების საკითხი. საკანონმდებლო დონეზე გატარებული გარკვეული ცვლილებების მიუხედავად, სახელმწიფო დღემდე ვერ ახერხებს მომეტებული საფრთხის მქონე სამუშაო ადგილებზე დასაქმებული მუშებისთვის ღირსეული და უსაფრთხო სამუშაო პირობების შექმნას“, – წერია კოალიციის განცხადებაში.
ღირსეული შრომის პლატფორმა აღნიშნავს, რომ მსგავს ობიექტებზე დასაქმებულთა შრომა უკიდურესად მოწყვლადი და სიცოცხლისა და ჯანმრთელობისათვის სახიფათოა.
კოალიციის განცხადებით, რომ მხოლოდ საკანონმდებლო ცვლილებები ვერ გადაჭრის ამ პრობლემას და მათივე თქმით, აუცილებელია აღსრულების ქმედითი მექანიზმების დროულად დანერგვაც.
„პანდემიის პირობებში, კორონავირუსის გავრცელების საფრთხის აღკვეთის მიზნით, შრომის ინსპექცია სახელმწიფოს მნიშვნელოვან დასაყრდენად იქცა. თუმცა, სათანადო რაოდენობის ადამიანური და მატერიალური რესურსების გარეშე, ინსპექცია, პანდემიის დროს კიდევ უფრო მეტად არის მოკლებული შესაძლებლობას, შეუფერხებლად და ეფექტიანად შეასრულოს მისი ძირითადი ფუნქციები“, – არნიშნულია განცხადებაში.
კოალიციის თქმით, სასიცოცხლოდ აუცილებელია ინსტიტუციურად ძლიერი, რესურსებით გამართული და დაბალანსებული შრომის ინსპექცია, რომელსაც სამუშაო ადგილებზე შრომის უსაფრთხოების, ყველა სახის შრომითი უფლების მონიტორინგის, აღსრულებისა და სანქცირების შესაბამისი მანდატი ექნება.
„აღნიშნული ინსტიტუციური მოწესრიგების შესაძლებლობას საქართველოს პარლამენტში წარდგენილი შრომის კოდექსის ცვლილებათა პაკეტი ითვალისწინებს, რომლის მხარდაჭერა და ქმედითი ღონისძიებების დროული განხორციელება დასაქმებულთა დასაცავად გადადგმული მნიშვნელოვანი ნაბიჯი იქნება“, – წერია ღირსეული შრომის პლატფორმის მიერ გავრცელებულ განცხადებაში.
ზემოაღნიშნულის გათვალისწინებით, პლატფორმა მოუწოდებს:
საქართველოს პარლამენტს და მთავრობას:
- შრომის ინსპექციის ინსტიტუციური გაძლიერების მიზნით, დროულად გაატაროს შესაბამისი საკანონმდებლო და ინსტიტუციური ცვლილებები;
- პანდემიის პირობებში იზრუნოს ინსპექციის შესაბამისი ადამიანური და მატერიალური რესურსებით უზრუნველყოფაზე;
შრომის პირობების ინსპექტირების დეპარტამენტს:
- დაუყოვნებლივ შეამოწმოს სს „საქართველოს რკინიგზაში“ არსებული შრომის უსაფრთხოების მდგომარეობა და განახორციელოს შესაბამისი რეაგირება;
საქართველოს შინაგან საქმეთა სამინისტროს:
- დროულად და ობიექტურად გამოიძიოს ქუთაისში მომხდარი საწარმოო შემთხვევა.
ხელმომწერი ორგანიზაციები:
• ადამიანის უფლებების სწავლებისა და მონიტორინგის ცენტრი (EMC);
• საქართველოს ახალგაზრდა იურისტთა ასოციაცია;
• ჯანდაცვისა და მომსახურების სფეროების პროფკავშირი – სოლიდარობის ქსელი;
• სოციალურ მუშაკთა გაერთიანება;
• საზოგადოებრივი მაუწყებლის პროფკავშირი;
• ღია საზოგადოების ფონდი;
• სატრანსპორტო კომპანიის დამოუკიდებელი პროფესიული კავშირი “ერთობა 2013”.
გუშინ, ქუთაისში რკინიგზაზე 2 მუშა მაღალი ძაბვის გადამცემი ხაზის საყრდენი კონსტრუქციის დემონტაჟის დროს დაუღუპა.
გამოძიება სსკ-ის 240 პრიმა მუხლის მე-3 ნაწილით დაწიყო, რაც ელექტრო- ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას ითვალისწინებს.
