„ლაზარეს თავისუფლებისთვის!” – ხვალ საღამოს 8 საათზე პარლამენტთან აქცია გაიმართება. ლაზარე გრიგორიადისის მხარდასაჭერად ქართველი მუსიკოსები თითო სიმღერასაც შეასრულებენ.
„რუსულ კანონზე უკანდახევის შემდეგ, რეჟიმმა კიდევ ერთი დარტყმა მიიღო – ქართული სასამართლოს უმაღლესი თანამდებობის პირები შეერთებული შტატების სანქციების ქვეშ არიან.
გვჯერა, რომ მოქალაქეების თანადგომას შეუძლია ლაზარე სანქცირებული სასამართლოს შერჩევითი სამართლისგან იხსნას და საერთო ეროვნულ წარმატებას მსხვერპლად არ შეეწიროს!
8 აპრილს, ლაზარეს შაბათს, ქართველი მუსიკოსები, მსახიობები და საზოგადოების წარმომადგენლები სოლიდარობას გამოუცხადებენ ლაზარეს.
ადამიანის შავრაზმული დემონიზაციის მცდელობა, ბუმერანგად უნდა დაუბრუნდეს ყველას, ვინც ამას ცდილობს!
აქციაზე იქნება მუსიკა, ბევრი სიტყვა, მაგრამ არ იქნებიან სიტყვით გამომსვლელები.
8 აპრილს, 20:00 საათზე პარლამენტთან ლაზარეს მხარდასაჭერად თითო სიმღერას შეასრულებენ: STEPHANE, აჩიკო გულედანი, „დაგდაგანი”, „წერილი”, LOUDSPEAKERS, „გამოუვალი მდგომარეობა”, „შაბათ-კვირა”, – ნათქვამია ორგანიზატორთა განცხადებაში.
მარტის აქციებზე ე.წ. მოლოტოვის კოქტეილის სროლაში ბრალდებული 21 წლის ლაზარე გრიგორიადისი პოლიციამ 29 მარტს ღამით დააკავა. 31 მარტს მას არკვეთი ღონისძიების სახით პატიმრობა შეეფარდა. ლაზარე გრიგორიადისის საქმის განხილვა საქალაქო სასამართლოში 1 მაისს იწყება.
