ლიტერატურული პრემია „საბას“ მეცხრამეტე დაჯილდოება 23 დეკემბერს, 23:00 საათზე გაიმართება.
პრემიის დაჯილდოების ცერემონია ტელეკომპანია „ფორმულას“ პირდაპირ ეთერში გადაიცემა, ასევე, „საბას“ და სხვადასხვა გამოცემის Facebook გვერდებზე.
„საბას“ ცნობით, წელს განსაკუთრებული სიახლეა – ლიტერატურულ კონკურსს დაემატა მე-10 ნომინაცია, რომელიც არასამთავრობო ორგანიზაციამ „საერთაშორისო გამჭვირვალობა – საქართველომ“ დააწესა, ხოლო გამარჯვებულს ჯილდოს გადასცემენ „საერთაშორისო გამჭვირვალობა – საქართველოს“ აღმასრულებელი დირექტორი ეკა გიგაური და ევროკავშირის ელჩი საქართველოში კარლ ჰარცელი.
საუკეთესო წიგნებსა და ავტორებს ჟიური შემდეგ 9 ნომინაციაში გამოავლენს:
- საუკეთესო რომანი
- საუკეთესო პოეტური კრებული
- საუკეთესო პროზაული კრებული
- საუკეთესო პიესა
- საუკეთესო ლიტერატურული კრიტიკა
- საუკეთესო ლიტერატურული დებიუტი
- საუკეთესო ესეისტიკა და დოკუმენტური პროზა
- უცხოური ნაწარმოების საუკეთესო ქართული თარგმანი
- ქართულ ლიტერატურაში შეტანილი განსაკუთრებული წვლილი.
პრემია „საბა“ თიბისიმ და რატი ამაღლობელმა 2002 წელს დააფუძნეს.
