„ძლიერი საქართველოს“ ერთ-ერთი ლიდერი პროკურატურაში იმყოფება, მას ბრალი უნდა წარუდგინონ.
მანამდე ის იმყოფებოდა თბილისის საქალაქო სასამართლოში, სადაც გამოკითხვის ოქმი გააცნეს. ხაზარაძე 27 მარტს გამოიკითხა მაგისტრატი მოსამართლის წინაშე.
საქმე ეხება „ქართული ოცნების“ პარლამენტში ენმ-ის საქმიანობის შემსწავლელი საგამოძიებო კომისიის მიმართვის საფუძველზე პროკურატურის მიერ დაწყებულ გამოძიებას. ხაზარაძე პარლამენტში არ მივიდა და თქვა, რომ ამ „ცირკში“ მონაწილეობას არ აპირებდა. რეგლამენტით, საგამოძიებო კომისიის მოთხოვნის შემთხვევაში სხდომაზე გამოცხადება სავალდებულოა. სისხლის სამართლის კოდექსის შესაბამისი მუხლი ჯარიმას ან ერთ წლამდე პატიმრობას ითვალისწინებს.
დღეს მან მედიასთან კომენტარში კიდევ ერთხელ გაიმეორა, რომ არ აღიარებს პარლამენტს.
„ბრალი ეხება ჩემს არმისვლას ე.წ. კომისიაში, რომელიც შექმნილია არალეგიტიმური პარლამენტის მიერ, ეს კომისია არის ცირკის სანახაობა თავის ხელმძღვანელიანად, რომელიც არა მარტო ცირკის სანახაობას გვთავაზობს ქართულ საზოგადოებას, არამედ პირდაპირ დისკრედიტაციას უკეთებს ჩვენს სახელმწიფოებრიობას. რანაირი ბრალიც არ უნდა იქნას წაყენებული, კიდევ ერთხელ, შესვლის წინ მკაფიოდ ვაცხადებ, იმავეს განვაცხადებ, რომ გამოვალ, მე არ ვიცი, რა ბრალს წამიყენებენ, არ ვაღიარებ ე.წ. პარლამენტს, არ ვაღიარებ ამ კომისიას, მით უმეტეს ის ანტიეროვნულ საქმიანობას ეწევა და გაგრძელდება ბრძოლა ყველა მეთოდით“, – თქვა ხაზარაძემ.
