პროკურატურა აცხადებს, რომ „ძლიერი საქართველოს“ ერთ-ერთ ლიდერს, მამუკა ხაზარაძეს ბრალდება წარედგინა. საქმე ეხება „ქართული ოცნების“ პარლამენტში ენმ-ის საქმიანობის შემსწავლელი საგამოძიებო კომისიის მიმართვის საფუძველზე პროკურატურის მიერ დაწყებულ გამოძიებას.
უწყება ამბობს, რომ პარლამენტში შექმნილი დროებითი საგამოძიებო კომისიის კანონიერი მოთხოვნის შეუსრულებლობის ფაქტზე მამუკა ხაზარაძეს ბრალდება სისხლის სამართლის კოდექსის 349-ე მუხლით წარუდგინეს.
პროკურატურა აცხადებს, რომ ბრალდებულისთვის აღკვეთის ღონისძიების შეფარდების მოთხოვნით სასამართლოს კანონით დადგენილ ვადაში მიმართავენ, თუმცა აღკვეთის სახე დაკონკრეტებული არაა. სისხლის სამართლის კოდექსის შესაბამისი მუხლი ჯარიმას ან ერთ წლამდე პატიმრობას ითვალისწინებს.
„გამოძიებით დადგინდა, რომ ბრალდებული საქართველოს პარლამენტში შექმნილ 2003 – 2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებით საგამოძიებო კომისიის 25 მარტის სხდომაზე დაბარებული იყო ახსნა-განმარტების მიცემის მიზნით. მიუხედავად იმისა, რომ მამუკა ხაზარაძეს კომისიის თავმჯდომარის ხელმოწერით შესაბამისი დოკუმენტი 22 მარტს გადაეცა და მისთვის ცნობილი იყო საქართველოს პარლამენტის დროებითი საგამოძიებო კომისიის სხდომაზე გამოცხადების ვალდებულების თაობაზე, ასევე გაფრთხილებული იყო გამოუცხადებლობის შემთხვევაში კანონმდებლობით გათვალისწინებული პასუხისმგებლობის შესახებ, იგი დროებითი საგამოძიებო კომისიის სხდომაზე არასაპატიო მიზეზით არ გამოცხადდა, რამაც საქართველოს პარლამენტის დროებითი საგამოძიებო კომისიის კანონიერი მოთხოვნის შეუსრულებლობა გამოიწვია“, – წერია განცხადებაში.
მამუკა ხაზარაძემ პროკურატურის დატოვების შემდეგ მედიასთან თქვა:
„პროკურორმა მარდა ყიყინაშვილმა წამიყენა ბრალი, ალბათ ხვალ გვეცოდინება სასამართლოზე, რას მოიცავს ეს ბრალეულობა. აქვე მინდა, კიდევ ერთხელ ძალიან მკაფიოდ დავაფიქსირო, რანაირი მუხლიც არ უნდა იყოს ამ ბრალში განსაზღვრული ან სასჯელი, ეს ვერანაირად ვერ შემაცვლევინებს იმ დამოკიდებულებას, რომ ჩვენი ქვეყანა არის მიტაცებული, არჩევნები არის მიტაცებული, ქვეყანა გადასარჩენია, ის კომისია არის ცირკი, რომელიც დისკრედიტაციას უკეთებს ჩვენ ქვეყანას, მის ეროვნულ ინტერესებს, ჩვენს სამხედროებს და დაღუპულ გმირებს, ბრძოლა იქნება ბოლომდე“.
