ფრანგი ულტრამემარჯვენე პოლიტიკოსი, მარინ ლე პენი პარიზის სასამართლომ დამნაშავედ ცნო ევროპული დაფინანსების მითვისების საქმეში.
ლე პენს და პარტია „ეროვნული გაერთიანების“ კიდევ 20 წევრს ედავებოდნენ, რომ მათ ევროპული პარლამენტის მიერ გამოყოფილი თანხა ბოროტად გამოიყენეს და უკანონოდ ჩაურიცხეს პარტიის წევრებს.
პარიზის სასამართლომ ლე პენს 2-წლიანი შინაპატიმრობა, 2-წლიანი პირობითი სასჯელი და 100 000 ევრო ჯარიმა დააკისრა. ასევე, მას 5 წლით აეკრძალა არჩევნებში მონაწილეობა.
მის პარტიას დაეკისრა ჯარიმა 2 მილიონი ევროს ოდენობით.
მოსამართლე ბენედიქტე დე პერტუისმა თქვა, რომ ლე პენის ქმედებები წარმოადგენს „სერიოზულ და ხანგრძლივ შეტევას დემოკრატიული ცხოვრების წესებზე ევროპაში, განსაკუთრებით კი საფრანგეთში“.
მოსამართლის განცხადებით, ლე პენისთვის არჩევნებში მონაწილეობის მიღების დაუყოვნებელი აკრძალვა უკავშირდება „დემოკრატიულ საზოგადოებრივ არეულობას“, რომელიც გაფლანგვაში მსჯავრდადებული პირის თანამდებობაზე არჩევას მოჰყვებოდა.
ულტრამემარჯვენე ლე პენს მხარდაჭერა გამოუცხადა უნგრეთის პრემიერ-მინისტრმა, ვიქტორ ორბანმა.
„Je suis Marine“ (მე ვარ მარინი) — დაწერა ორბანმა X-ზე.
