საპარლამენტო უმრავლესობის ლიდერი მამუკა მდინარაძე აცხადებს, რომ ოპონენტები „ოცნების“ ახალ ინიციატივასთან ისეთი მეთოდებით დაპირისპირებას ვერ გაბედავენ, როგორც დაუპირისპირდნენ „რუსულ კანონს“.
მდინარაძის თქმით, ისინი ეცნობიან სოციალურ ქსელებში გამოთქმულ მოსაზრებებს, რადგან აინტერესებთ, „ვინ გაბედავს ამ საკითხთან დაპირისპირებას“.
„საფრთხე იმდენად რეალურია, რომ აქ სპეკულაციურ დაპირისპირებას ვერ გაბედავენ. ახლა შემოაგდებინეს, რამდენიმე სამწუხაროდ მათი ტელევიზიის ერთი ორმა ჟურნალისტმა დაპოსტა, ამას განსაკუთრებით ვეცნობით ამ ბოლო დღეებში, ბოლო ერთი დღის განმავლობაში, პირდაპირ ვამბობ, ვინ გაბედავს ამ საკითხთან დაპირისპირებას, ძალიან გვაინტერესებს“, – ამბობს მდინარაძე.
ამავე განცხადებაში მდინარაძემ დააზუსტა, რომ მომავალ კანონპროექტში ძირითადი აქცენტი იქნება „ლგბტ პროპაგანდა“.
„ძირითადად აქცენტი გვაქვს ლგბტ პროპაგანდის მავნე შედეგებზე და სხვა საკითხებში ზედმეტ ჩარევას არ ვაპირებთ. ფსევდოლიბერალური იდეოლოგიის გავრცელების ავანგარდში რადგან ეს თემა დგას, ჩვენ ამ თემას განსაკუთრებით ვუპირისპირდებით და ვუპირისპირდებით ლგბტ იდეოლოგიის პროპაგანდას და არ ამ თემის წარმომადგენლებს.
არც ერთ არატრადიციული ცხოვრების წესის მიმდევარს კი არ ვუპირისპირდებით, ჩვენ მათ დავიცავთ. რისკი არსებობს, რომ ეს თემა რადიკალებისთვის სამიზნე გახდეს. მაგრამ, პირიქით. აქაც სწორად უნდა გავიაროთ, ოქროს შუალედი მოვძებნოთ – ადამიანის უფლებების დაცვის ხარისხი მაღალ რეგისტრში, მაღალ ხარისხში ავიდეს, მაგრამ კატეგორიულად გამოირიცხოს ლგბტ პროპაგანდის შესაძლებლობა“, – განაცხადა მდინარაძემ.
მისივე თქმით, კანონპროექტში ფორმულირების შესამუშავებლად იწვევს ოპოზიციურ პარტიებს.
