აშშ-ის საგარეო საქმეთა კომიტეტის სხდომაზე, სადაც „MEGOBARI აქტის” შესწორებები განიხილეს, კონგრესმენმა ბილ კიტინგმა მხარდაჭერა გამოხატა კანონპროექტის მიმართ და აღნიშნა, რომ „ქართული ოცნების” ქმედებები უპასუხოდ არ დარჩება.
„მინდა ჩემი მტკიცე მხარდაჭერა გამოვხატო „MEGOBARI აქტის” მიმართ – ორპარტიული „MEGOBARI აქტი” ცხადყოფს, რომ „ქართული ოცნების” ხელმძღვანელობის ბოლოდროინდელი ქმედებები არ დარჩება უპასუხოდ”, – განაცხადა მან.
ჟურნალისტი ალექს რაუფოღლუ აღნიშნავს, რომ კანონპროექტმა საგარეო საქმეთა კომიტეტის სხდომა წარმატებით გაიარა და კენჭისყრა, სავარაუდოდ, დღეს, 11 ივლისს გაიმართება. ჟურნალისტს წყაროები ეუბნებიან, რომ მას დიდი ალბათობით კომიტეტი მხარს დაუჭერს.
MEGOBARI აქტის“ ინიციატორი აშშ-ის საკანონმდებლო ორგანოს ქვედა პალატის წევრი – რესპუბლიკელი კონგრესმენი ჯო უილსონია.
„MEGOBARI აქტის“ თანახმად, ერთი მხრივ, პასუხი უნდა აგონ იმ პირებმა, რომლებიც საქართველოში „რუსული სტილის უცხო ქვეყნის აგენტების კანონის მიღებაზე ან შესაძლო ამოქმედებაზე არიან პასუხისმგებელნი“.
მეორე მხრივ კი, ის „საქართველოს მიერ დემოკრატიული, დასავლური კურსის გამყარების შემთხვევაში“ ქვეყანას გაძლიერებულ მხარდაჭერას – გაზრდილ ფინანსურ დახმარებას და სავიზო რეჟიმის შერბილებას ჰპირდება.
აშშ-ში კანონის ძალაში შესვლამდე ინიციირებულმა კანონპროექტმა რამდენიმე ნაბიჯი უნდა გაიაროს. თავდაპირველად, კანონპროექტი წარმომადგენელთა პალატის კომიტეტს შესასწავლად წარედგინება, რის შემდეგაც კომიტეტი ნიშნავს თარიღს კენჭისყრისთვის, დებატების ან შესწორებებისთვის.
იმ შემთხვევაში, თუ კანონპროექტს უბრალო უმრავლესობის მხარდაჭერა ექნება, პროექტი განსახილველად გადაეცემა სენატს. სენატში კანონპროექტის განხილვა ინიშნება კიდევ ერთ კომიტეტში, რომელიც შემდეგ მართავს მსჯელობას და კენჭისყრას. სენატის მხარდასაჭერადაც საჭიროა უბრალო უმრავლესობა.
საბოლოოდ, თუ არსებობს უთანხმოება კანონმდებლობის ირგვლივ, მის მოგვარებას ცდილობს კონგრესის კონფერენციის კომიტეტი, რომელიც წარმომადგენელთა პალატისა და სენატის წევრებისგან შედგება. უთანხმოებებზე შეჯერების შემდეგ კანონპროექტი ბრუნდება სენატსა და წარმომადგენელთა პალატაში საბოლოო დადასტურებისთვის, რის შემდეგაც აშშ-ის პრეზიდენტს აქვს 10 დღე, რათა ხელი მოაწეროს პროექტს.
კონგრესის სასესიო პერიოდი გაგრძელდება 5 აგვისტომდე, რის შემდეგაც 9 სექტემბრის ჩათვლით იქნება არდადეგები.
