ავჭალაში, ე.წ. ტიტანიკის კორპუსში, ლიფტის შახტში 13 წლის ბავშვი ჩავარდა და დაიღუპა.
ავარიული კორპუსის მცხოვრებლები მედიასთან აცხადებენ, რომ გამგეობას და მერიას არაერთხელ მიმართეს, თუმცა მათ ყურადღებას არავინ აქცევს.
თბილისის მერიამ „პუბლიკას“ მიაწოდა განცადება, რომელშიც ნათქვამია, რომ ე.წ. ტიტანიკის კორპუსი გასული საუკუნის 80-იანი წლებიდან ავარიულია და ამ მიზეზით, კორპუსში ლიფტი მოწყობილი არასდროს ყოფილა. მერიის მტკიცებით, მოსახლეობის გამოყვანის პროცესი წლების წინ დაიწყო – მოსახლეობას შესთავაზეს კორპუსის ჩანაცვლების პროგრამაში მონაწილეობა. მათი ცნობით, ნაწილი შეთავაზებას დასთანხმდა, ნაწილი კი კვლავ უარს აცხადებს ქირით გასვლაზე.
„გვინდა, მწუხარება გამოვთქვათ გლდანის რაიონში მომხდარი ტრაგიკული შემთხვევის შედეგად გარდაცვლილი მოზარდის გამო. ვუსამძიმრებთ მის ოჯახსა და ახლობლებს.
შემთხვევა მოხდა ლიბანის ქუჩა N22 არსებული ე.წ. ,ტიტანიკის კორპუსის სახურავზე, სადაც მოზარდი, თანატოლებთან ერთად, სკეიდბორდით იმყოფებოდა. მოზარდი სახურავიდან ლიფტის შახტში ჩავარდა. ბავშვები აღნიშნული კორპუსის მცხოვრებლები არ არიან.
ე.წ. ტიტანიკის კორპუსი გასული საუკუნის 80-იანი წლებიდან მოყოლებული ავარიულ მდგომარეობაშია და სწორედ ავარიულობის გამო, კორპუსში ლიფტი მოწყობილი არასდროს ყოფილა.
მოსახლეობის გამოყვანის პროცესი თბილისის მერიამ წლების წინ დაიწყო. მობინადრეებს შეეთავაზათ ქირით გაყვანა და „ავარიული კორპუსების ჩანაცვლების პროგრამაში” მონაწილეობა.
უსაფრთხოების მიზნით, გლდანის რაიონის გამგეობამ მოსახლეობას არაერთხელ შესთავაზა ქირით უზრუნველყოფა და მოსთხოვა დაუყონებლივ გასვლა აღნიშნული შენობიდან. მოსახლეობის ნაწილი შეთავაზებას დათანხმდა, ნაწილი კი რჩება აღნიშნულ მისამართზე საცხოვრებლად და უარს აცხადებს ქირით გასვლაზე.
თბილისის განვითარების ფონდი კვლავ გამოთქვამს მზაობას, მოხდეს კორპუსის ჩანაცვლება, თუმცა, როგორც საზოგადოებისთვის არის ცნობილი, ამისთვის საჭიროა მოსახლეობის 100%-იანი თანხმობა“, – ნათქვამია მერიის განცხადებაში.
