თბილისის მერიის შპს „თბილსერვის ჯგუფმა“ გამარტივებული შესყიდვის ფარგლებში „ღამის შოუ სტუდიისთან“ 195 800 ლარის ღირებულების ხელშეკრულება გააფორმა.
ხელშეკრულების საგანია „საახალწლო გასანათებელი მოწყობილობებისა და აქსესუარების, საახალწლო ნაძვის ხის მორთვა-გაფორმების თანმდევი მომსახურება“.
28 ოქტომბრით დათარიღებული ხელშეკრულება ითვალისწინებს არსებული ნაძვის ხის ტოტების (83 ცალი) გადაკეთებას ახალ ზომებზე, ახალი 139 ცალი ტოტის დამზადებას, 215 ცალი 70-ნათურიანი, 21 მეტრი სიგრძის გირლიანდის შეძენას, რკინის კონსტრუქციების მუქ მწვანე ფრად შეღებვას და ა.შ.
საახალწლო ნაძვის ხის მორთვა-გაფორმებაზე გათვალისწინებულია 103 850 ლარი, გირლიანდებზე 70 950 (ერთეულის ფასი 330 ლარი), ხოლო 300 ცალი შესაბამისი „სტრინგი კაბელისთვის” 21 000 ლარი.
თბილისის მერია „პუბლიკის” შეკითხვაზე – რატომ მიიღო მერიამ ამ მომსახურების შესყიდვის გადაწყვეტილება, პასუხობს, რომ ყველა ამ კითხვებს უახლოეს დღეებში გაეცემა პასუხი.
დედაქალაქში 2019-2020 წლის საახალწლო ღონისძიებების ორგანიზებისათვის ბიუჯეტით გათვალისწინებული თანხა 3 415 974 ლარს შეადგენდა. აღნიშნულ თანხაში შედიოდა მთავარი საახალწლო ნაძვის ხის ღირებულება – 304 848 ევრო (დაახლოებით მილიონ ლარამდე). გასულ წელს ჯამში საახალწლო ღონისძიებები, მორთულობა და სხვადასხვა ტიპის შესყიდვა დედაქალქს დაახლოებით 6 164 589 ლარი დაუჯდა.
![კალაძე შაიშმელაშვილზე: რომ არა [აქციის მონაწილეების] მხრიდან ძალადობა, არც ერთ ადამიანს ერთი თმის ღერი არ ჩამოუვარდებოდა](https://publika.ge/app/uploads/2024/10/publika.ge-1-32-1024x684.jpg)
