„მერს ასფალტოვიჩს რატომ ეძახი?!“ - მოქალაქე ამბობს, რომ ფოთის მერის კრიტიკის გამო 5-მა პირმა სცემა

მოქალაქე ვლადიმერ ამბალია ამბობს, რომ სოციალურ ქსელში კრიტიკული შინაარსის პოსტებისა და ვიდეოების გამოქვეყნების გამო, ფოთის მერთან, ბექა ვაჭარაძესთან დაახლოებული პირები ფიზიკურად გაუსწორდნენ. „ტვ პირველთან“ საუბარში ის ყვება, რომ მის კუთვნილ ავტოსამრეცხაოში 5 ადამიანი დაესხა თავს. მედიის ცნობით, შემთხვევა ორი დღის წინ მოხდა, ამბალიამ კლინიკა ცოტა ხნის წინ დატოვა.

„ტვ პირველთან“ მოქალაქე ყვება, რომ თავდასხმა დღის საათებში, პოლიციის შენობიდან 100 მეტრის დაშორებით მოხდა, შემთხვევის დროს ადგილზე იმყოფებოდა არასრულწლოვანიც, ფიზიკურ დაპირისპირებას წინ უძღუდა სიტყვიერი შელაპარაკება.

„ტვ პირველის“ ცნობით, იდენტიფიცირებულია ინციდენტში მონაწილე სამი პირი – ლაშა გვალია, ლაშა ყურუა და დავით თავაძე. ამბალია ამბობს, რომ ისინი ბექა ვაჭარაძის მეგობრები არიან.

„ეს ვიდეოები რომ ჩაიწერა, თან იმ ეფექტში ვარ, რისთვისაც მინდა ყველას მოვუხადო ბოდიში, ვილანძღები არა, იქ ვიგინები, ისე მაქვს ნერვები. ერთი წელია ჩამოსული ვარ ესპანეთიდან. 4 წელი წასული ვიყავი და იგივე ქალაქი დამხვდა, იგივე სიტუაციები და პრობლემები დამხვდა და ხალხი, მეგობრები, ყველა გაქცეული…. ამ ვიდეოების შემდეგ, ეს ეძღვნებოდა თან ქალაქის მერს, ბექა ვაჭარაძეს, რომელსაც მოვიხსენიებ როგორც „ასფალტოვიჩს“. ეს ის ბექა ვაჭარაძეა, რომელსაც ადრე შევთავაზეთ ფესტივალი და უარი თქვა, ახლა გამოუშვა სადამსჯელო ღონისძიება… მოძებნეს ამათმა ისეთი მომენტი, რომ მარტო ვყოფილიყავი, 5-მა კაცმა გამლახა და არც კი მოუსმენიათ, „ასფალტოვიჩს“ რატომ ვეძახი მერს, ამით მოვიდნენ… ორი წუთი ხდება, კარგად ჩანს, ვდგები, აგიხსნით მეთქი, ამ სიტყვის შემდეგ რა იწყება, ამას რა ჰქვია არ ვიცი. ეს ადგილი არის პოლიციიდან 100 მეტრში. ანუ ტიპები არიან, რომ მათია ქალაქი და შენ, რაო?! აწი არ შევხვდეთ, თორემ მერე განახებო… ვინც გადავხედეთ, ყველა არის ბექა ვაჭარაძის მეგობარი, ბავშვობიდან, სკოლაში პირველი კლასიდან რომ ერთად იყვნენ, უმეტესობა, უფრო სწორად“, – ყვება ის „ტვ პირველთან“.

განახლება: „პუბლიკას“ შინაგან საქმეთა სამინისტროში უთხრეს, რომ მომხდარზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.

„პუბლიკა“ შეეცადა ფოთის მერიისგან პასუხის მიღებას, თუმცა ჩვენ სატელეფონო ზარებს არ უპასუხეს.