საქართველოს მე-3 პრეზიდენტი მიხეილ სააკაშვილი დღეს, 17 მარტს, დამნაშავედ ცნეს საზღვრის უკანონოდ გადმოკვეთის საქმეზე.
„მიხეილ სააკაშვილი ცნობილ იქნეს დამნაშავედ სსკ-ის 344-ე მუხლის პირველი ნაწილით გათვალისწინებული დანაშაულის ჩადენისთვის და განესაზღვროს თავისუფლების აღკვეთა 4 წლითა და 6 თვის ვადით.
საქართველოს სსკ-ის 59-ე მუხლის მე-3 და მე-4 ნაწილების საფუძველზე ამ განაჩენით დანიშნულ სასჯელს ნაწილობრივ დაემატოს 12 მარტის განაჩენით თავისუფლების აღკვეთა 8 წლის ვადით […] და საბოლოო განაჩენის ერთობლიობით განესაზღვროს თავისუფლების აღკვეთა 12 წლით და 6 თვით“, – განაცხადა მოსამართლემ.
გადაწყვეტილება მოსამართლე მიხეილ ჯინჯოლიამ გამოიტანა.
მიხეილ სააკაშვილს უკვე ორ საქმეზე აქვს პატიმრობა მისჯილი, სანდრო გირგვლიანის საქმეზე 6 წლით, ხოლო ე.წ. პიჯაკების საქმეზე – 9 წლით.
მოსამართლე ჯინჯოლიამ ისარგებლა სისხლის სამართლის კოდექსის ჩანაწერით, რომლის მიხედვით, „დანაშაულის რეციდივის შემთხვევაში, დანაშაულთა ერთობლიობის დროს საბოლოო სასჯელის დანიშვნისას უფრო მკაცრი სასჯელი შთანთქავს ნაკლებად მკაცრს, ანდა ამ დანაშაულთათვის განსაზღვრული სასჯელები ნაწილობრივ ან მთლიანად შეიკრიბება.
ამ წესით დაინიშნება სასჯელი, თუ განაჩენის გამოტანის შემდეგ დადგინდა, რომ მსჯავრდებულს ბრალი მიუძღვის სხვა დანაშაულშიც, რომელიც მან პირველ საქმეზე განაჩენის გამოტანამდე ჩაიდინა. ამ შემთხვევაში საბოლოო სასჯელში ჩაითვლება სასჯელი, რომელიც პირველი განაჩენით მოხდილია მთლიანად ან ნაწილობრივ.“
ის 2021 წლის 1 ოქტომბერს დააკავეს და მისი პატიმრობის ვადის ათვლა სწორედ ამ დღიდან იწყება.
სასამართლო განაგრძობს 7 ნოემბრის საქმის განხილვას.
