„მოძრაობა სოციალური დემოკრატიისთვის“ ამბობს, რომ იუსტიციის სამინისტრო მათ რეგისტრაციაზე უარს ეუბნება. მათი განცხადებით, გადაწყვიტეს იურიდიულ პირად დარეგისტრირებულიყვნენ და 21 თებერვალს მიმართეს სამინისტროს იურიდიულ პირთა რეესტრს.
„მოძრაობა სოციალური დემოკრატიისთვის“ აცხადებს, რომ უწყებამ მათ მიერ წარდგენილ დოკუმენტებში ხარვეზი იპოვა, რაც 25 თებერვალს აღმოფხვრეს, თუმცა ამ დრომდე არ არიან დარეგისტრირებული.
„იუსტიციის სამინისტრო ჩვენს რეგისტრაციაზე უარს ამბობს. არც მიზეზს გვეუბნება და არც ერთ პროცედურას არ იცავს. მოძრაობის სრულფასოვნად ფუნქციონირებისთვის, მოძრაობას სჭირდება ოფიციალური ფორმა, რის გამოც გადავწყვიტეთ, იურიდიულ პირად დავრეგისტირებულიყავით.
21 თებერვალს ამ მოთხოვნით მივმართეთ იუსტიციის სამინისტროს იურიდიულ პირთა რეესტრს. უწყებამ ჩვენს მიერ წარდგენილ დოკუმენტებში ხარვეზი იპოვა და მომდევნო დღეს გვაცნობა ამის შესახებ. ჩვენ ეს ხარვეზი უმოკლეს ვადაში, 25 თებერვალს აღმოვფხვერით. კანონი სამინისტროს ავალდებულებს, რომ ერთი დღის ვადაში (26 თებერვლის ბოლომდე) დავერეგისტრირებინეთ. თუმცა დღეს 6 მარტია და მათგან ჯერაც არაფერი ისმის. 27, 28 თებერვალს, 4 და 6 მარტს იუსტიციის სამინისტროს ცხელ ხაზზე დავრეკეთ და ვაცნობეთ ამ კანონდარღვევის შესახებ, თუმცა უშედეგოდ. ამ თვითნებობით ჩვენი მოძრაობა ფერხდება. ამას აღვიქვამთ როგორც ჩვენს საქმიანობაში ჩარევას და ხელის შეშლას“, – აცხადებს მოძრაობა.
„პუბლიკა“ დაუკავშირდა იუსტიციის სამინისტროს. უწყებიდან პასუხის მიღების შემთხვევაში მასალა განახლდება.
