მოლდოვის პარლამენტმა საბოლოო მოსმენით დაუჭირა მხარი „დამოუკიდებელ სახელმწიფოთა თანამეგობრობის“ (დსთ) დატოვებას. ინიციატივამ 60 დეპუტატის მხარდაჭერა მიიღო, 27 წინააღმდეგი იყო, ხოლო სამმა თავი შეიკავა.
მოლდოვის პარლამენტის განცხადების მიხედვით, დსთ-ის დაფუძნების შესახებ შეთანხმების, მასთან დაკავშირებული ოქმისა და დსთ-ის წესდების გაუქმების შედეგად სახელმწიფო, დაახლოებით, 3.1 მილიონ ლეის დაზოგავს. ეს ის თანხაა, რომელიც დსთ-ის ბიუჯეტში ყოველწლიურად შეჰქონდათ.
„წევრ ქვეყნებთან ურთიერთობები გაგრძელდება ორმხრივ და მრავალმხრივ პლატფორმებზე, ხოლო მოლდოვის რესპუბლიკა კვლავ დარჩება დსთ-ის რამდენიმე ხელშეკრულების მხარედ, განსაკუთრებით სავაჭრო, ეკონომიკურ და სოციალურ სფეროებში“, – ნათქვამია განცხადებაში.
შეთანხმების გაუქმების ინიციატორი მოლდოვის საგარეო საქმეთა სამინისტრო იყო. უწყება ამტკიცებს, რომ დსთ-ის ის ღირებულება და პრინციპი, რომ წევრი სახელმწიფოები პატივს უნდა სცემდნენ ერთმანეთის ტერიტორიულ მთლიანაბასა და საზღვრების ხელშეუხებლობას, დაცული არაა.
„ეს პრინციპი, რომელიც საფუძვლად დაედო დსთ-ის ჩამოყალიბებას, დარღვეულია რუსეთის ფედერაციის მიერ, რომელიც აწარმოებს ომს უკრაინის წინააღმდეგ, განახორციელა აგრესიის აქტები საქართველოს წინააღმდეგ და უკანონოდ ინარჩუნებს სამხედრო ძალებს მოლდოვის რესპუბლიკის ტერიტორიაზე“, — ნათქვამია განცხადებაში.
დამოუკიდებელ სახელმწიფოთა თანამეგობრობის (დსთ) შექმნის შესახებ შეთანხმებას 1991 წელს მოაწერა ხელი 11-მა ქვეყანამ, მათ შორის, მოლდოვის რესპუბლიკამ.
შეთანხმების მთავარი მიზანი საბჭოთა კავშირის დაშლისა და დსთ-ის შექმნის დაფიქსირება იყო. 1993 წელს ხელი მოეწერა დსთ-ის წესდებას, რომელმაც თანამეგობრობის პრინციპები დაადგინა.
დღეის მდგომარეობით, მოლდოვას დსთ-სთან არსებული დაახლოებით 70 შეთანხმება აქვს გაუქმებული, რაც ეროვნული პოლიტიკის ევროკავშირის სტანდარტებთან და ნორმებთან შესაბამისობაში მოყვანისა და საკანონმდებლო და ეკონომიკური ჩარჩოს მოდერნიზაციის მიმდინარე პროცესის ნაწილია.
