ბათუმის საქალაქო სასამართლოში მზია ამაღლობელის სისხლის სამართლის საქმის პროცესი მიმდინარეობს.
სხდომაზე მტკიცებულებების ნაწილის დასაშვებობის საკითხი განიხილეს. მტკიცებულებების განხილვა წინა – 27 მარტის სხდომაზე უნდა დასრულებულიყო, თუმცა, მაია მწარიაშვილმა შუამდგომლობა დააყენა და ახალი მტკიცებულებების ნუსხა წარმოადგინა, რომელიც პროკურატურას გასაცნობად გადასცა.
დღევანდელ პროცესზე ბრალდების მხარემ თქვა, რომ ნაწილობრივ ეთანხმება დაცვის მხარის შუამდგომლობას. თუმცა, არ დაეთანხმა ადვოკატების მოთხოვნას, მტკიცებულებებს დაერთოს იმ მოწმეთა ჩვენებები, რომლებიც დაიკითხნენ მზია ამაღლობელის ადმინისტრაციული სამართალწარმოების ფარგლებში.
პროკურორმა თორნიკე გოგეშვილმა თქვა, რომ მზია ამაღლობელის სისხლის სამართლის საქმეში მისი ადმინისტრაციული საქმის მოწმეთა ჩვენებები რელევანტური არ არის.
მზია ამაღლობელის ადვოკატის, მაია მწარიაშვილის თქმით, დაცვის მხარეს იმედი ჰქონდა, რომ ბრალდება თავად წარმოადგენდა ამ მტკიცებულებებს, ვინაიდან „უდავოა, რომ ადმინისტრაციულ საქმეს კავშირი აქვს სისხლის სამართლის საქმესთან“.
„ბრალდების ფორმულირება გახლავთ იმდაგვარი, რომ ბატონი დგებუაძის ინციდენტი უკავშირდება შურისძიებას და ეს შურისძიება დაკავშირებულია ქალბატონი მზიას ადმინისტრაციულ დაკავებასთან – ამ ფაქტობრივ გარემოების შეფასების გარეშე სასამართლო ვერ მიიღებს ამ საქმეზე გადაწყვეტილებას. ჩვენ უნდა ვიცოდეთ, რამდენად მართლზომიერად მოქმედებდნენ მზია ამაღლობელის წინააღმდეგ“, – თქვა მწარიაშვილმა და განაცხადა, რომ შუამდგომლობს, გამოსაკითხ მოწმეთა სიაში შეიყვანონ პოლიციელი გოჩა ვანაძე, რომელიც ხელს აწერს მზია ამაღლობელის დაკავების ოქმს და აცხადებს, რომ ადმინისტრაციული წესით ჟურნალისტი მან დააკავა, ასევე პოლიციელი ნოდარ ზენაიშვილი, რომელიც ფიგურირებს მზია ამაღლობელის დაკავების საქმეში – მისი ჩვენების მიხედვით, ზენაიშვილმა მზია ამაღლობელის დაკავების ოქმი შეავსო.
მაია მწარიაშვილის თქმით, ასევე შუამდგომლობენ ადვოკატები, საქმეს დაერთოს 13 და 25 მარტის ადმინისტრაციული საქმის პროცესის წერილობითი და აუდიო ოქმები.
„სისხლის სამართლის დაკავების ოქმში წერია მხოლოდ ის, რომ პოლიციელებს ეძახდა – ძაღლებო, ღორებო და რუსეთის მონებო, ანუ სიტყვიერ შეურაცხყოფას აყენებდა.
ადმინისტრაციული საქმის განხილვისას სწორედ ეს განავრცო მოწმემ, რომ თურმე მზია არა მხოლოდ ამას აკეთებდა, ასევე თურმე ხელს უშლიდა პოლიციას სხვა სამართალდამრღვევების დაკავებაში, რაც სრულიად ახალი გარემოებაა. ჩვენი მტკიცებულებებით ვადასტურებთ, რომ ყველა სამართალდამრღვევი უკვე დაკავებული იყო, მხოლოდ ამიტომ ვერ გაუწევდა წინააღმდეგობას, ეს რომც ეცადა და ამისი ფიზიკური შესაძლებლობები ჰქონოდა.
ამიტომ, ამის გამოკვლევის საშუალება დაცვის მხარეს უნდა ჰქონდეს, თუ არადა, ამ სასამართლო პროცესს ვერ ექნება პრეტენზია ვერანაირ სამართლიანობაზე, ობიექტურობასა და ყოვლისმომცველობაზე. თუ არ მოგვცემთ საშუალებას, ეს დოკუმენტები გამოვიკვლიოთ, მაშინ საერთოდ რას ვიხილავთ აქ“, – თქვა მწარიაშვილმა.
მოსამართლე ნინო სახელაშვილმა უარი თქვა ადმინისტრაციული საქმის მოწმე პოლიციელების გამოსაკითხ პირთა სიაში დამატებაზე.
„მათ უკვე გამოხატეს საკუთარი პოზიცია, მიმაჩნია, რომ ამ ნაწილთან დაკავშირებით არ უნდა მოხდეს მათი დაკითხვა სასამართლო სხდომაზე“, – თქვა ნინო სახელაშვილმა.
ამავე დროს, ის დაეთანხმა საქმეში 13 და 25 მარტის ადმინისტრაციული სხდომების წერილობითი და აუდიო ოქმების დართვას.
სახელაშვილის მიერ ამ გადაწყვეტილების გამოცხადების შემდეგ ბათუმელმა აქტივისტმა, ციალა ქათამიძემ მას „ბიძინა ივანიშვილის მონა“ უწოდა. ქათამიძე დარბაზიდან გააძევეს.
27 მარტს ქუთაისის სააპელაციო სასამართლომ დასაშვებად ცნო იმ მტკიცებულებების ნაწილი, რომლებიც ბათუმის საქალაქო სასამართლომ გამორიცხა.
საქმე ეხება სხვადასხვა სახის მტკიცებულებას, კერძოდ: ვიდეოჩანაწერებს; რამდენიმე წერილობით დოკ უმენტს, ერთი მოწმის გამოკითხვის ოქმს.
სააპელაციო სასამართლომ დასაშვებ მტკიცებულებად ცნო საჯაროდ, ინტერნეტში ხელმისაწვდომი ვიდეოები, რომლებიც დეტალურად ასახავს მზია ამაღლობელის დაკავებამდე, დაკავების პროცესს და შემდგომ მოვლენებს.
4 მარტს ბათუმის საქალაქო სასამართლოში გამართულ წინასასამართლო სხდომაზე პროკურატურამ ამ და სხვა მტკიცებულებების დაუშვებლად ცნობა მოითხოვა და ეს საქმესთან შეუსაბამობის საბაბით ახსნა.
მოსამართლე ვიქტორ მეტრეველმა პროკურატურის მოთხოვნა დააკმაყოფილა, თუმცა, არა საქმესთან შეუსაბამობის გამო – მეტრეველმა თქვა, რომ კომპიუტერულ მოწყობილობაში არსებული ინფორმაციის მოპოვებას, თუნდაც ის საჯაროდ იყოს გავრცელებული, მოსამართლის განჩინება სჭირდება, მზია ამაღლობელის დაცვის მხარის მიერ წარმოდგენილი მტკიცებულებები კი განჩინების გარეშე იყო წარმოდგენილი.
მტკიცებულებების საკითხის განხილვის შემდეგ დაცვის მხარემ მოითხოვა, პროცესზე გამოცხადდეს სასამართლო მეგობრის პოზიციის შემდგენი ადამიანი.
სასამართლო მეგობრის პოზიცია „სოციალური სამართლიანობის ცენტრმა“ მოამზადა.
ასევე, დაცვის მხარემ თქვა შესავალი სიტყვა.
ადვოკატ ჯუბა ქათამაძის თქმით, მზია ამაღლობელის საქმეში ვლინდება პოლიტიკური დაინტერესება.
მისი განცხადებით, პოლიტიკური ინტერესი ვლინდება, მათ შორის, პროკურატურის, შსს-ის და სასამართლოს გადაწყვეტილებებში.
ადვოკატმა მიმართა მოსამართლე ნინო სახელაშვილს:
„თქვენი მხრიდან ამორიცხულია ყველანაირი მტკიცებულება, ყველანაირად ცდილობს სასამართლო, ფარდა გადააფაროს ამ საქმის იმ ნაწილს, სადაც რეალურად ხდებოდა უკანონო ადმინისტრაციული დაკავება და სამართალდამცველების მხრიდან ძალადობა.
ამის ნაწილია თქვენი დღევანდელი გადაწყვეტილებაც: დაუშვით ადმინისტრაციული საქმის წარმოების ოქმები და ფაქტობრივად თქვით, რომ ადმინისტრაციული საქმე უკავშირდება სისხლის სამართლის საქმეს. მაგრამ არ დაუშვით 2 მოწმე, რომლებიც საქმეზე უნდა დაკითხულიყვნენ.
შეგახსენებთ, რომ მათ ადმინისტრაციულ საქმეზე მიაწოდეთ ინფორმაცია, სისხლის სამართლის საქმეზე კი სრულიად სხვა სტანდარტია”.
„ბათუმელები/ნეტგაზეთის” დამფუძნებელს მზია ამაღლობელს ბათუმის პოლიციის უფროსის, ირაკლი დგებუაძისთვის სახეში სილის გაწვნის გამო პოლიციელზე თავდასხმას ედავებიან. მას 4-დან 7 წლამდე პატიმრობა ემუქრება.
11 იანვარს დაწყებულ აქციაზე მზია ამაღლობელი ორჯერ დააკავეს – თავდაპირველად 11 იანვრის ღამეს, კედელზე პლაკატის გაკვრის გამო. მოგვიანებით ის გაათავისუფლეს. გათავისუფლებიდან მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს, უკვე 12 იანვარს, 2 სხვა პირთან ერთად.
13 იანვარს „ბათუმელებმა/ნეტგაზეთმა” გაავრცელა ვიდეო და ინფორმაცია, რომ მათ დირექტორს, მზია ამაღლობელს ბათუმის პოლიციის უფროსი ირაკლი დგებუაძე აგინებს და ვიდეოში ისმის მისი სიტყვები: „სისხლით… ბო*იშვილი ვიყო, სისხლით დავიჭერ, ამას მოვუ**ნავ დედის მუ*ელს“.
15 იანვარს საიას თავმჯდომარემ, ნონა ქურდოვანიძემ მზია ამაღლობელთან რუსთავის ციხეში ვიზიტის შემდეგ ისაუბრა ირაკლი დგებუაძის მხრიდან არასათანადო მოპყრობაზე.
ქურდოვანიძემ აღნიშნა, რომ დგებუაძემ ამაღლობელს სახეში შეაფურთხა, ასევე, მისი ბრძანების შესაბამისად, მზია ამაღლობელს არ ეძლეოდა გარკვეული დროის განმავლობაში წყლის დალევის, ასევე, საპირფარეშოთი სარგებლობის შესაძლებლობა.
მზია ამაღლობელი უსამართლობას 38 დღის განმავლობაში შიმშილობით აპროტესტებდა.
