კახა კალაძემ ქალაქის მთავრობის სხდომაზე ბიზნესის მხარდაჭერის ახალი პროგრამის შესახებ ისაუბრა. მისი თქმით, პროგრამა 2022 წლიდან ამოქმედდება. კალაძის თქმით, მუნიციპალიტეტისა და მუნიციპალური საწარმოების მოიჯარეებს 2021-2022 წლებში საიჯარო გადასახადისგან გაათავისუფლებენ.
„შევიმუშავეთ ბიზნესის მხარდამჭერი რიგი ღონისძიებები. კერძოდ, მუნიციპალიტეტისა და მუნიციპალური საწარმოების მოიჯარეებს გავათავისუფლებთ 2021-2022 წლებში გადასახდელი საიჯარო გადასახადისგან. ასევე, იმის გათვალისწინებით, რომ პანდემიის შედეგად მათი ეკონომიკური აქტივობა შემცირდა, საიჯარო ვადების კორექტირებას ვთავაზობთ ორი წლით, რაც იმას ნიშნავს, რომ პირდაპირი წესით, ორი წლით გავუხანგრძლივებთ საიჯარო ვადებს. ასევე, იმ პირებს, რომლებსაც 2020 წლის პირველი იანვრიდან 2022 წლის პირველ იანვრამდე პერიოდში გაუვიდათ ან გასდით საიჯარო ხელშეკრულების ვადა მუნიციპალიტეტთან ან მუნიციპალურ საწარმოებთან, შევთავაზებთ ამ საიჯარო უფლების ორი წლით აღდგენას“, – განაცხადა კახა კალაძემ.
დედაქალაქის მერის თქმით, აღნიშნული პროექტის ფარგლებში, ტურისტული ობიექტები გათავისუფლდება დასუფთავების მოსაკრებლისგან.
„ამავე პერიოდში, საიჯარო ხელშეკრულების გადასახადის პირგასამტეხლოების ჩამოწერა მოხდება. ტურისტული ობიექტები – რესტორნები, სასტუმროები და სხვები, ერთჯერადად გათავისუფლდებიან დასუფთავების მოსაკრებლისგან. პანდემიის შედეგად, მნიშვნელოვნად დაზარალდა ეკონომიკური სექტორი, განსაკუთრებით, მცირე და საშუალო ბიზნესი. მათ უკან უამრავი ოჯახი და ადამიანი დგას. ამიტომ, მნიშვნელოვანია მათი მხარდასაჭერი ღონისძიებების გაგრძელება. ბიზნესის მხარდაჭერის პროგრამა პროექტის სახით უკვე გაგზავნილია თბილისის საკრებულოში და იმედი მაქვს საკრებულოს უმრავლესობის მხარდაჭერის. ვფიქრობ, ეს იქნება ერთგვარი ხელშეწყობა მცირე და საშუალო ბიზნესისთვის“, – აღნიშნა კახა კალაძემ.
