მწერლები, მთარგმნელები და გამომცემლები გენრი დოლიძეს მხარდაჭერას უცხადებენ

02 აგვისტო, 2023

პუბლიკა 12:54, 02 აგვისტო, 2023

02 აგვისტო, 2023

ქართველი მწერლები, მთარგმნელები და გამომცემლები პოეტ გენრი დოლიძის მხარდამჭერ განცხადებას ავრცელებენ. ისინი სამართალდამცავ უწყებებს საქმის უსწრაფესი გამოძიებისკენ მოუწოდებენ.

გენრი დოლიძე აცხადებს, რომ 31 ივლისს ბათუმში აქციაზე დაკავებისას მას პოლიცია ფიზიკურად გაუსწორდა.

„პოეტი გენრი დოლიძე მოძალადე პოლიციური სისტემის კიდევ ერთი მსხვერპლია. ის დააკავეს მაშინ, როცა ოკუპაციის კანონდამრღვევი რუსი ტურისტებით სავსე გემის ბათუმში შემოსვლას აპროტესტებდა.

პოლიციამ უკვე არაერთხელ აირჩია ქართველი მწერლების მიმართ სასტიკი და ღირსების შემლახავი მოპყრობის ფორმები. ამ შემთხვევაში, როგორ ჩანს, პოლიციელები განსაკუთრებით გააღიზიანა გენრი დოლიძის ბოლოდროინდელმა სამოქალაქო აქტივობამაც.

ქართველი მწერლები, მთარგმნელები და გამომცემლები ვგმობთ გენრი დოლიძის სასტიკად ცემის ფაქტს (რამდენიმე სახის დაზიანება უკვე ექსპერტიზის მიერაა დადასტურებული) და მოვუწოდებთ საქართველოს მთავრობას, უსწრაფესად გამოიძიოს ეს საქმე და მკაცრად დასაჯოს მოძალადეები”, – ნათქვამია განცხადებაში.

გენრი დოლიძე, რომელიც ბათუმში პარტია „დროას” ორგანიზაციის თავმჯდომარეა, ამბობს, რომ დაკავებისას პოლიციელებმა მას ფიზიკური და სიტყვიერი შეურაცხყოფა მიაყენეს.

როგორც მან „tv პირველის“ ეთერში განაცხადა, მასზე ფიზიკურად იძალადა პოლიციის მაღალჩინოსანმა ირაკლი დგებუაძემ. დოლიძე ჰყვება, რომ პოლიციელებმა მას ხელბორკილები დაადეს და „წიხლებით სცემეს“, რა დროსაც, მისივე თქმით, ადგილზე მივიდა ბათუმის სამმართველოს უფროსი, ირაკლი დგებუაძე, რომელმაც ამოიცნო გენრი დოლიძე და როდესაც დარწმუნდა მის ვინაობაში, „დედა შეაგინა და თვალის არეში წიხლი ჩაარტყა“.

„აკავებდნენ ერთ-ერთ აქტივისტს, რომელსაც მე ვიცნობ, ასაკიანი ადამიანია, არის აფხაზეთის ომის ვეტერანი და დევნილი… ვიყვირე, ავწიე ხელები, რომ აფხაზეთის ომის ვეტერანს რუსების გამო როგორ აკავებთ-მეთქი. ხალხზე იმოქმედა ამ ჩემმა სიტყვამ, მართლა ეძგერა ხალხი და არ დაუთმეს ეს ვეტერანი… და როდესაც პოლიციას მოუწია მისი დათმობა, მე ჩამავლეს ხელი. შენ ხომ არ ხარ ვეტერანიო და პირდაპირ წამოვიდა გინება დედის მიმართულებით. გამიყვანეს კორდონს მიღმა, შემომარტყეს ალყა, გამიკეთეს ხელბორკილები, წიხლები დამაჭირეს სახეზე. მოვიდა ამ დროს ირაკლი დგებუაძე, რომელმაც, რა თქმა უნდა, იმ მომენტში ვერ მიცნო, იმიტომ, რომ სხვა დაკავებაზე იყო გადართული და ეს რომელიაო, იკითხა, ამაწევინეს თავი და როდესაც მოახერხა ჩემი, როგორც პოლიტიკოსის „დროას“ წარმომადგენლის იდენტიფიცირება, შემაგინა, წაქცეულ დაწოლილს, ხელებზე ბორკილებდადებულ, მიწაზე გართხმულ ადამიანს, რომელსაც ათი პოლიციელის ფეხი მეჭირა… და როცა მიცნო, შემაგინა და თვალის არეში მომიქნია ფეხი, ჩამარტყა, იძალადა ფიზიკურად ჩემზე…“, – ამბობს დოლიძე.

განცხადებას ხელს აწერენ: