„ნაციონალური მოძრაობის“ ორგანიზებით, საქართველოს ოთხ ქალაქში საპროტესტო აქციები მიმდინარეობს. აქციის მონაწილეთა განცხადებით, ისინი ქვეყანაში შექმნილ მძიმე ეკონომიკურ სიტუაციას, კომუნალური გადასახადების ზრდასა და საკვები პროდუქტების გაძვირებას აპროტესტებენ.
საპროტესტო აქციებს თბილისში – „ქართული ოცნების“ ოფისთან, ფოთში, ქობულეთსა და ქუთაისში მართავენ.
„ნაციონალური მოძრაობის“ წევრის, ირაკლი ნადირაძის თქმით, თბილისში ისინი შეიკრიბნენ „ქართული ოცნების“ ოფისთან, რადგან მმართველი გუნდი და მათ გამო ქვეყანაში გაზრდილი კორუფციაა დამნაშავე გართულებულ ეკონომიკურ მდგომარეობაში.
„დაანონსებული საოცნებო ეკონომიკისა და ცხოვრების ნაცვლად ხალხმა მიიღო გაძვირებული ცხოვრება. გაძვირდა პროდუქტი, გაძვირდა მედიკამენტები, გაძვირდა კომუნალური გადასახადები, გაძვირდა ტრანსპორტი და ადამიანები უბრალოდ შიმშილობენ. მათ შორის, შიმშილობენ ბავშვები და ეს შიმშილობა იქნება მანამ, სანამ „ქართული ოცნება“ მართავს ქვეყანას“, – აცხადებს ირაკლი ნადირაძე.
აქციის ერთ-ერთი მონაწილის, გიორგი მუმლაძის თქმით კი, „ქართული ოცნების“ ხელისუფლებაში მოსვლის შემდეგ სულ უფრო მეტი ადამიანი ტოვებს ქვეყანას, რასაც მმართველი გუნდი მიზანმიმართულად უწყობს ხელს.
„ამ სოციალურმა კატასტროფამ გამოიწვია ის, რომ ყოველი მეორე ადამიანი ცდილობს, რომ გაიქცეს ქვეყნიდან.
ამიტომაც, ის სტატისტიკური მონაცემი, რომ ჩვენ ვართ ათეულში ბანგლადეშთან, სომალსა და ავღანეთთან ერთად იმ ქვეყნებს შორის, ვინც თავშესაფარს ეძებს ევროკავშირის ქვეყნებში, კიდევ ერთხელ უსვამს ხაზს იმას, თუ რა კატასტროფაში ვცხოვრობთ.
ქართველი ხალხის გადინებას და გაქცევას უწყობს ხელს ბიძინა ივანიშვილი. ეს 2019 წელს მან თქვა, რომ წასულიყო ქართველი ხალხი ემიგრაციაში. ეს არის მისი ოცნება – საქართველო ქართველების გარეშე“, – ამბობს აქტივისტი გიორგი მუმლაძე.
დღეს გამართული აქციის მონაწილეები აცხადებენ, რომ სიტუაციის გამოსწორებისთვის აუცილებელია, ვადამდელი საპარლამენტო არჩევნები დაინიშნოს.
