NBC: ტრამპი ამბობს, რომ ის „ძალიან გაბრაზებულია“ პუტინზე

NBC News-ის ინფორმაციით, მათთან ინტერვიუში დონალდ ტრამპმა თქვა, რომ „ძალიან გაბრაზებული“ და „გაღიზიანებული“ იყო, როდესაც პუტინმა ზელენსკის სანდოობასა და უკრაინაში ახალ მმართველობაზე დაიწყო საუბარი.

ამავე ინტერვიუში აშშ-ის პრეზიდენტმა თქვა, რომ თუ რუსეთთან შეთანხმება ვერ მოხდა და ის იფიქრებს, რომ ეს რუსეთის ბრალია, აპირებს მეორადი ტარიფების დაწესებას ყველანაირ ნავთობზე, რომელიც რუსეთიდან მოდის.

 „თუ მე და რუსეთმა ვერ მოვახერხეთ შეთანხმება უკრაინაში სისხლის ღვრის შეჩერებაზე და თუ ვიფიქრებ, რომ ეს რუსეთის ბრალი იყო – რაც შეიძლება არც იყოს, მაგრამ თუ ვიფიქრებ, რომ ეს რუსეთის ბრალი იყო, ვაპირებ მეორადი ტარიფების დაწესებას ნავთობზე, ყველანაირ ნავთობზე, რომელიც რუსეთიდან მოდის. ეს იქნება ის, რომ თუ ნავთობს იყიდი რუსეთიდან, შეერთებულ შტატებში ბიზნესს ვერ აწარმოებ. ყველა სახის ნავთობზე იქნება 25-პროცენტიანი ტარიფი, 25-დან 50%-მდე ტარიფი ყველა ნავთობზე“, – თქვა ტრამპმა NBC-ს ცნობით.

ტრამპმა თქვა, რომ პუტინთან საუბარს მომავალ კვირაში გეგმავს. მან აღნიშნა, რომ პუტინის მოწოდება უკრაინაში ახალი ხელისუფლების შესახებ ნიშნავს სამშვიდობო შეთანხმების გადადებას.

ამ კვირაში რუსეთის პრეზიდენტი პუტინი გამოვიდა წინადადებით, რომ უკრაინაში „საერთაშორისო მმართველობა“ დამყარდეს და ახალი არჩევნები ჩატარდეს. ეს იდეა უარყვეს როგორც ამერიკის, ისე ევროკავშირის ინსტიტუციების წარმომადგენლებმა.