არასამთავრობო ორგანიზაციების განცხადებით, 9 მაისის „ერთიანობის და თავისუფლების დღის იდეას“ უერთდებიან და საზოგადოებას 9 მაისს, 19:00 საათზე ევროპის მოედანზე შეკრებისკენ მოუწოდებენ.
მანამდე, 17:00 საათიდან ევროპის მოედნისკენ მსვლელობები დაიწყება შემდეგი წერტილებიდან:
- საქართველოს პარლამენტის შენობიდან (სტუდენტების მარში);
- მარჯანიშვილის მოედნიდან;
- რესპუბლიკის მოედნიდან;
- ავლაბრის მეტროსადგურიდან.
„75 წლის წინ სწორედ ამ დღეს ჩაეყარა საფუძველი ევროკავშირს – სახელმწიფოების ისტორიაში ყველაზე წარმატებულ და მძლავრ პოლიტიკური და ეკონომიკური თანამშრომლობის გაერთიანებას, სადაც ყველა ქვეყანა და ყველა მოქალაქე თავისუფალია: დაცულია ძალადობისგან, უსამართლობისა და სიღარიბისგან, დაცულია იმისგან რომ არ დევნიან, სადარბაზოებში არ უსწორდებიან, სამსახურებიდან უკანონოდ ათავისუფლებენ, აქვთ ღირსეული ცხოვრების პირობები და არ ცხოვრობენ უსამართლობაში.
სამწუხაროდ, ჩვენს ქვეყანაში ჯერ კიდევ რეალობაა პოლიტიკური რეპრესიები, წამება, ოპონენტებზე ფიზიკური თავდასხმის ორგანიზება და მოძალადეთა დაუსჯელობა, პოლიტიკური პატიმრები, დაკავებული და ნაცემი ჟურნალისტები, კორუფცია და უსამართლო სასამართლო, სიღარიბე. დამოუკიდებელ სახელმწიფო ინსტიტუციებზე დაწესებული პოლიტიკური კონტროლი სერიოზულ საფრთხეს უქმნის როგორც სახელმწიფოებრივ სტაბილურობას, ისე მოქალაქეთა კეთილდღეობას, სამართლიანობის იდეას და ევროპულ მომავალს.
საქართველომ ევროპული ცივილიზაციის გზაზე საუკუნეების წინ დაიწყო სვლა. გვჯერა, რომ საქართველოს ადგილი ევროპაშია. გვჯერა, რომ ევროკავშირში გაწევრება ჩვენი ქვეყნისთვის, მისი თითოეული მოქალაქის კეთილდღეობის, უსაფრთხოებისა და განვითარებისთვის სასიცოცხლოდ მნიშვნელოვანია. და, რაც მთავარია ვიცით, რომ ხალხის ნება ყოველთვის ამარცხებს ბოროტებას. ამიტომ 2025 წლის 9 მაისს, ქართველები ევროპის დღეს ვხვდებით ერთად ევროპის მოედანზე უცვლელი მოთხოვნებით.
საქართველო ეკუთვნის ევროპას, ხოლო ევროპის დაპირება – ქართველ ხალხს.
ჩვენი ძალა ევროპაშია.
ჩვენი ძალა ერთობაშია“, – განაცხადა ნინო ლომჯარიამ.
