მოსამართლე ნინო ენუქიძემ სერგო მარიამიძე სამართალდამრღვევად ცნო და 15 დღით თავისუფლების აღკვეთა შეუფარდა.
სერგო მარიამიძე ადმინისტრაციული წესით 18 თებერვალს, ბიძინა ივანიშვილის დაბადების დღის აქციაზე დააკავეს. მარიამიძე ამბობს, რომ საპროტესტო აქციაზე მან ხელი გადახვია ფოიერვერკის მსროლელ ბიჭს, რომელსაც არ იცნობდა და მისი დაკავების საფუძველი სწორედ ეს გახდა.
შინაგან საქმეთა სამინისტრო მას ადმინისტრაციული სამართალდარღვევის კოდექსის 173 — პოლიციელის კანონიერი მოთხოვნისადმი დაუმორჩილებლობას და 174 პრიმა მუხლის — შეკრებისა და მანიფესტაციის წესის დარღვევას — პიროტექნიკის სროლას ედავებოდა.
სერგო მარიამიძის ინტერესებს სასამართლოში „უფლებები საქართველო“ იცავს.
ორგანიზაციის ცნობით, სასამართლო სხდომაზე შინაგან საქმეთა სამინისტრომ წარადგინა ვიდეომტკიცებულება, სადაც ნათლად ჩანდა, რომ პიროტექნიკას სხვა პირი ისროდა.
„უფლებები საქართველოს“ თანახმად, პასუხად მოწმე პოლიციელმა აღნიშნა, რომ პიროტექნიკა ეკავა როგორც არაიდენტიფიცირებად პიროვნებას, ისე — სერგო მარიამიძეს და თქვა, რომ მათ 4 ფოიერვერკი გაისროლეს.
თუმცა, როდესაც დაცვის მხარემ კვლავ დაუსვა დამაზუსტებელი შეკითხვა, მოწმე პოლიციელმა სასამართლოს წინაშე მიცემული თავდაპირველი ჩვენება გადააკეთა და განმარტა, რომ სერგო მარიამიძემ არაიდენტიფიცირებად პირთან ერთად გაისროლა ერთი ფოიერვერკი.
