ნორვეგიამ შესაძლოა, რუსეთის საზღვრის გასწვრივ ღობე ააშენოს, – განაცხადა იუსტიციის მინისტრმა, ემილი ენგერ მეჰლიმ. მისივე თქმით, ღობე შეიძლება აღმართონ მთლიანი, 198-კილომეტრიანი სახმელეთო საზღვრის ან მისი ნაწილის გასწვრივ.
ნორვეგიის საზოგადოებრივ მაუწყებელთან საუბრისას მინისტრმა თქვა, რომ იდეა საინტერესოა, არა მხოლოდ იმიტომ, რომ ღობე შეიძლება შემაკავებელი ფაქტორი იყოს, არამედ იმიტომაც, რომ ის მოიცავს სენსორებსა და ტექნოლოგიას, რომელიც საშუალებას იძლევა, დადგინდეს, მიდიან თუ არა ადამიანები საზღვართან ახლოს.
მინისტრმა აღნიშნა, რომ ნორვეგიის მთავრობა სხვადასხვა ზომას განიხილავს რუსეთთან საზღვრის უსაფრთხოების გასაძლიერებლად. ენგერ მეჰლი შთაგონებულია ფინეთის პროექტით, რომელიც ამჟამად აშენებს ჯამში 200 კილომეტრამდე სიგრძის ღობეს ცალკეულ მონაკვეთებში სასაზღვრო ზონის გასწვრივ.
