მასალა შესწორებულია
„ქართული ოცნების“ პარლამენტმა დღეს, 1 აპრილს მესამე მოსმენით განხილვები და კენჭისყრა ჩაატარა.
მესამე მოსმენით განიხილეს და კენჭისყრაზე საბოლოოდ მიიღეს:
- „ფარას ქართული თარგმანი“;
- მედიის შემზღუდავი ორი ცვლილება;
- სისხლის სამართლის კოდექსში სამშობლოს ღალატის მუხლის ჩამატების ცვლილება;
- მესამე მოსმენით განიხილეს კანონმდებლობიდან ტერმინ „გენდერის“ ამოღების პაკეტი; [შესწორება: ეს პროექტი მესამე მოსმენით 1 აპრილს განიხილეს, თუმცა კენჭი 2 აპრილს უყარეს]
- კორუფციის წინააღმდეგ ბრძოლის კანონში ცვლილება, რომლითაც საჯარო მოსამსახურეებს და მოსამართლეებს საგანმანათლებლო საქმიანობისთვის ხელმძღვანელის ნებართვა სჭირდებათ;
- ასევე განიხილეს საჯარო გადაწყვეტილების მიღების პროცესიდან NGO-ების ამორიცხვის პაკეტი, რომელიც მოიცავს ცესკოს წევრებისა და იუსტიციის საბჭოს წევრების არჩევის წესის ცვლილებას; [შესწორება: ეს პროექტი მესამე მოსმენით 1 აპრილს განიხილეს, თუმცა კენჭი 2 აპრილს უყარეს]
- სამი მოსმენით მიიღეს საჯარო სამსახურის შესახებ კანონში ცვლილებების პაკეტი, რომელიც მოიცავს თეატრების ხელმძღვანელობის ორსაფეხურიანი მოდელის გაუქმებასაც.
„ოცნების“ პარლამენტის მიერ მიღებულ კანონებს მიხეილ ყაველაშვილმა უნდა მოაწეროს ხელი და გამოაქვეყნოს. ამის შემდეგ კანონი გათვალისწინებულ ვადებში შედის ძალაში.
FARA-ს ქართული ანალოგის ამოქმედებისთვის 60 დღეა განსაზღვრული.
ქართული არასამთავრობო და მედიაორგანიზაციები, რომლებიც უცხოურ დაფინანსებას იღებენ, აცხადებენ, რომ აშშ-ში მოქმედი FARA დამოუკიდებელი არასამთავრობო ორგანიზაციებისა და თავისუფალი მედიის საქმიანობას არ უპირისპირდება, ივანიშვილის არალეგიტიმურ ხელისუფლებას კი სამოქალაქო სექტორის წინააღმდეგ მიღებული რუსული კანონის გადაფუთვა სურს.
მაუწყებლობის შესახებ კანონში ორ ცვლილებას 85 და 86 მომხრე ჰყავდა. ამ ცვლილებებით მაუწყებლების დაფინანსებისა და მუშაობის სტანდარტები დარეგულირდება.
დაფინანსების აკრძალვა „უცხოური ძალისგან“ მიღებულ პირდაპირ და ირიბ დაფინანსებას უკავშირდება, ხოლო მუშაობის სტანდარტებთან დაკავშირებით, „ოცნება“ ამტკიცებს, რომ დანერგავენ ე.წ. ბრიტანულ მოდელს, რომლითაც ხარისხიანი და ობიექტური ინფორმაცია იქნება უზრუნველყოფილი. საკითხები, რომლებიც მედიის თვითრეგულირების მექანიზმს ექვემდებარებოდა, კანონის რეგულირების სფეროში გადადის.
საკითხები, რომელიც მაუწყებლის ქცევის კოდექსით იყო განსაზღვრული, მაუწყებლობის შესახებ კანონში ჩაიწერა.
ეს კანონი ყაველაშვილის ხელმოწერისთანავე ამოქმედდება.
