„ქართული ოცნების“ პარლამენტმა საბოლოოდ მიიღო „სიტყვისა და გამოხატვის თავისუფლების შესახებ” კანონში ცვლილებები.
ცვლილებებს მხარი „ოცნების“ 84-მა წევრმა დაუჭირა, ხოლო წინააღმდეგი არავინ იყო.
კანონში შეტანილი ცვლილებების მიხედვით:
- ზუსტდება ცილისწამების განმარტება;
- კანონის შინაარსობრივი რეგულირება გავრცელდება საჯარო სივრცეში შეურაცხყოფაზე;
- სასამართლოში ცილისწამების საქმეზე მტკიცების ტვირთი გადადის მოპასუხეზე;
- კანონს ექნება 100-დღიანი უკუძალა, რაც ნიშნავს, რომ ის რეგულაციის ამოქმედებამდე 100 დღით ადრე გაკეთებულ განცხადებებზეც გავრცელდება.
- უქმდება ჩანაწერი, რომლის მიხედვით, ყოველგვარი ეჭვი, რომელიც ვერ დადასტურდება კანონით დადგენილი წესით, უნდა გადაწყდეს სიტყვის თავისუფლების შეზღუდვის საწინააღმდეგოდ;
- უქმდება კვალიფიციური პრივილეგია ცილისწამებისთვის;
- პროფესიული საიდუმლოების/წყაროს გამხელაზე უარი, შესაძლოა, მოპასუხის საწინააღმდეგო გადაწყვეტილების საფუძველი გახდეს;
- გამოხატვის თავისუფლება, შესაძლოა, შეიზღუდოს კერძო ცხოვრების ხელშეუხებლობისა და პერსონალური მონაცემების დაცვის მოტივით;
- იცვლება ცილისწამებით მიღებული ზიანის ანაზღაურების წესი. თუ სასამართლო მიიჩნევს, რომ უარყოფა ან შესწორება არაა საკმარისი, მოპასუხეს, შესაძლოა, დაეკისროს ქონებრივი/არაქონებრივი ზიანის ანაზღაურება.
- ცილისწამების დავებს სასამართლო შემჭიდროებულ ვადებში განიხილავს. ცილისწამების დავაზე მორიგებისთვის 10 დღე განისაზღვრება.
კანონპროექტის პირველი მოსმენით განხილვისას დავით მათიკაშვილმა განაცხადა, რომ კანონი, რომელშიც ცვლილებები შედის, არის ე.წ. „ბოკერია-რამიშვილის კანონი“, რომლითაც სიტყვის და გამოხატვის თავისუფლებასა და სხვა უფლებებს შორის ბალანსი დარღვეული იყო.
„ქართული ოცნების” პარლამენტმა „სიტყვისა და გამოხატვის თავისუფლების შესახებ” კანონში ცვლილებები დაჩქარებული წესით განიხილა და 2 დღეში მიიღო.
