პარლამენტის მიმდებარედ პოლიციასა და აქტივისტებს შორის დაპირისპირება იყო, აქტივისტი გელა ხასაია პოლიციამ განყოფილებაში გადაიყვანა.
შსს-ს ცნობით, გელა ხასაია პოლიციელის დაუმორჩილებლობის მუხლითაა დაკავებული.
დღეს პარლამენტთან აქციაა დაგეგმილი. იქ ამ დროისთვის „კოალიცია ცვლილებებისთვის“ აქტივისტები იმყოფებიან. მედიაში გაკეთებული განცხადებების მიხედვით, აქტივისტები სცენის გამართვისთვის ნებართვას ელოდებიან.
პარლამენტთან მობილიზებულმა საპატრულო პოლიციამ „გონივრული ეჭვის საფუძველზე“ აქტივისტ გელა ხასაიას ჩანთის გახსნა მოსთხოვა.
როგორც პატრულ-ინსპექტორმა მედიას განუცხადა, ხასაიას დათვალიერება საჭირო გახდა იმისთვის, რომ „ამოწმებენ, აქციაზე მოქალაქეებისთვის საფრთხისშემცველი ნივთები არ შეიტანონ ტერიტორიაზე“.
პოლიციის მოთხოვნის მიუხედავად, გელა ხასაიამ ჩანთის გახსნაზე უარი თქვა, ის ამბობს, რომ ჩანთის გახსნა გარეგანი დათვალიერება არაა. ამის შემდეგ ის პოლიციელებმა მანქანაში ძალის გამოყენებით ჩასვეს და გადაიყვანეს.
პოლიციელებმა მედიას უთხრეს, რომ ხასაია დაკავებული არაა: „არ ვაკავებთ, გადავიყვანთ და გადავამოწმებთ“, – თქვა პოლიციელმა.
„ვისზეც მექნება საფუძველი, ყველას გავუჩხრეკ [ჩანთას]“, – თქვა პოლიციელმა.
