„იურიდიულ საკითხთა კომიტეტმა ანტიკორუფციული სააგენტოს შესახებ წინა მოწვევის პარლმენტში ინიცირებული საკანონმდებლო პაკეტის მე-10 მოწვევის პარლამენტის მიერ განხილვა მიზანშეუწონლად მიიჩნია. ამგვარი დამოკიდებულება განსაკუთრებით შემაშფოთებელია იმ გამოწვევების ფონზე, რომელთა წინაშეც საქართველო ამჟამად ანტიკორუფციული პოლიტიკის სფეროში დგას“, – განცხადებას ამის შესახებ ორგანიზაცია „საერთაშორისო გამჭვირვალობა – საქართველო“ ავრცელებს.
რეგლამენტის თანახმად, წამყვანი კომიტეტი ახალარჩეული პარლამენტის პირველი სხდომიდან 4 თვეში ადგენს წინა მოწვევის პარლამენტში განსახილველად წარდგენილ იმ კანონპროექტთა ნუსხას, რომელთა განხილვის პროცედურის გაგრძელებაც მიზანშეწონილად მიაჩნია, და მას წარუდგენს პარლამენტის ბიუროს.
როგორც განცხადებაშია აღნიშნული, მე-9 მოწვევის პარლამენტში, 2020 წლის 31 აგვისტოს, ბიუროზე დარეგისტრირდა პარლამენტის წევრების: თამარ ჩუგოშვილის, თამარ ხულორდავას, ირინე ფრუიძის, ნინო გოგუაძისა და დიმიტრი ცქიტიშვილის ინიციატივა ეროვნული ანტიკორუფციული სააგენტოს შექმნის შესახებ, რაც „საერთაშორისო გამჭვირვალობა – საქართველოსთან“ აქტიური თანამშრომლობით შემუშავდა და მიზნად ისახავს კორუფციასთან ბრძოლის და პრევენციის ინსტიტუციური მექანიზმის შექმნას, რაც ხელს შეუწყობს კორუფციის (მათ შორის მაღალი დონის კორუფციის) შემთხვევების ქმედით გამოძიებას, ანტიკორუფციული პოლიტიკის ეფექტიანად დაგეგმვასა და განხორციელებას, ანტიკორუფციული კანონმდებლობის აღსრულების სათანადო მექანიზმების შექმნას.
მათი თქმით, ცვლილებათა პაკეტი ითვალისწინებს დამოუკიდებელი სახელმწიფო ორგანოს – ეროვნული ანტიკორუფციული სააგენტოს შექმნას, რომლის საქმიანობის ძირითადი მიმართულებები იქნება:
- საჯარო სამსახურში კორუფციის პრევენცია;
- თანამდებობის პირების მიერ „საჯარო დაწესებულებაში ინტერესთა შეუთავსებლობისა და კორუფციის შესახებ“ საქართველოს კანონით დადგენილი ნორმების შესრულების კონტროლი;
- კორუფციული დანაშაულების მიუკერძოებელი და ეფექტიანი გამოძიება;
- პოლიტიკური პარტიების ფინანსური საქმიანობის კონტროლი.
„კომიტეტის ეს გადაწყვეტილება მიუთითებს მმართველი პარტიის მხრიდან პოლიტიკური ნების არარსებობაზე, გადადგას მნიშვნელოვანი ნაბიჯები ქვეყნის ანტიკორუფციული კანონმდებლობისა და პრაქტიკის გასაუმჯობესებლად, ასევე კორუფციის წინააღმდეგ ბრძოლის ეფექტური სისტემის ჩამოყალიბების მიმართულებით“, – ნათქვამია გავრცელებულ განცხადებაში.
როგორც ორგანიზაციის განცხადებაშია აღნიშნული, „საერთაშორისო გამჭვირვალობა – საქართველო“ ყოველკვირეულ რეჟიმში აქვეყნებს მასალას მაღალი თანამდებობის პირების სავარაუდოდ კორუფციაში ჩართულობის შესახებ, რასაც, მათი თქმით, უმეტეს შემთხვევაში ეფექტიანი გამოძიება არ მოყვება და შესაბამისად, სათანადო რეაგირების გარეშე რჩება მრავალი მსგავსი შემთხვევა.
უარყოფითი ტენდენციები შეინიშნება სახელმწიფო შესყიდვების მიმართულებით, რაც განსაკუთრებით ცხადი გახდა პამდემიის პერიოდში. მნიშვნელოვან გამოწვევად რჩება ნეპოტიზმი, რადგანაც ახლად დანიშნული თანამდებობის პირები ხშირად საჯარო სამსახურში მათი ოჯახის წევრებს ასაქმებენ.
მნიშვნელოვანი პრობლემები ვლინდება პოლიტიკური პარტიების დაფინანსების გამჭვირვალობასთან დაკავშირებით.
ასევე შემაშფოთებელია საზოგადოებრივი აზრის კვლევების შედეგები. გამოკითხულ მოქალაქეთა დიდი ნაწილი ფიქრობს, რომ არსებული ანტიკორუფციული სისტემა სათანადოდ ვერ უმკლავდება მაღალი დონის კორუფციის შემთხვევების გამოძიების ამოცანას.
ანტიკორუფციული რეფორმების შეჩერების გამო წლებია არ გაუმჯობესებულა საქართველოს შედეგი „კორუფციის აღქმის ინდექსში“, – აღნიშნულია განცხადებაში.
„საერთაშორისო გამჭვირვალობა – საქართველო“ მოუწოდებს საქართველოს პარლამენტს, გააგრძელოს მუშაობა აღნიშნულ საკანონმდებლო ინიციატივაზე.
