„თავისუფლება გიორგი ხასაიას და კაკო ჩიქობავას!”, – მწერალმა და მუსიკოსმა ზურა ჯიშკარიანმა პეტიცია შექმნა, რომელიც მოქალაქეებისთვის ხელმოსაწერად ღიაა.
ტექსტში ნათქვამია, რომ ხასაია და ჩიქობავა პოლიციის წინააღმდეგ გამიზნულად არ მოქმედებდნენ, ეს არ იყო წინასწარი ჩანაფიქრი და რომ მათ გააპროტესტეს გამოსახლების არაადამიანური ფორმები. გთავაზობთ ტექსტს სრულად:
„როცა ქვეყნის მთავარი „ხულიგნები” არიან საქართველოს ისტორიის ლექტორი სახელმწიფო უნივერსიტეტში და ანთროპოლოგიის დოქტორანტი ილიას სახელმწიფო უნივერსიტეტში და პროკურატურა ითხოვს მათ 3-იდან 6 წლამდე პატიმრობას – ე.ი. რაღაც არასწორად მუშაობს სახელმწიფოში.
უნდა დავსვათ კითხვა: ნუთუ აკადემიური სფეროს წარმომადგენლები, ადამიანები, რომლებიც თვეებსა და წლებს უძღვნიან წიგნების კითხვას, სწავლასა და ცოდნის გაზიარებას – კრიმინალები არიან?
ან იქნებ საქმე ის არის, რომ უსამართლობის დონე ისეთი მაღალია ქვეყანაში, რომ ეს ხალხი იძულებულია აკადემიიდან ქუჩაში გამოვიდეს?
რაღაც არასწორად მუშაობს სახელმწიფოში…
როგორ შეიძლება დრაკონული მევახშეობა იყოს წახალისებული კანონის მიერ?
მრავალშვილიანი ოჯახების გამოსახლება და ქუჩაში დატოვება იყოს წახალისებული კანონის მიერ?
როგორ შეიძლება გამოსახლების ოპერაციაში მონაწილეობდეს ათეულობით აღსრულების პოლიციის აგრესიული თანამშრომელი, რომელსაც უფლება აქვს გაანგრიოს და გაჭრას კარი და იქ მყოფ ადამიანებს მხუთავი აირი(!) შეუგდოს? (ძალადობრივი გამოსახლებისას, 23 იანვარს კეკელიძის 1 ნომერში პროტესტის მონაწილეებთან და ჟურნალისტებთან ერთად იმყოფებოდნენ მოხუცები და არასრულწლოვანები).
რატომ არის, რომ პატრული, რომელიც ემსახურება საქართველოს, ორ მხარეს შორის კი არ დგას მშვიდობის დასაცავად, არამედ მევახშეების მხარეს იჭერს და ცემს ახალგაზრდებს, ჟურნალისტებს ძალადობრივად უშლის ხელს საქმიანობაში, აკეთებს კორდონს იმისათვის, რომ მევახშემ წყნარად შეძლოს სადარბაზოს კარის განგრევა? თუ ისინი თვლიან, რომ ამით ემსახურებიან საქართველოს, ჩვენ – საქართველოს მოქალაქეები ვამბობთ, რომ ისინი არასწორ მხარეს დგანან. საქართველო არ არის მევახშეობა, გამოძალვა, სტუდენტის ცემა, ლექტორის დაპატიმრება, ფულის კეთება უღირსად და ოჯახების გამოყრა ზამთრის ყინვაში. უსამართლობის გაპროტესტება, ჩაგრულის მხარეს დგომა და თავისუფლებისთვის ბრძოლა უფრო გვგონია ჩვენ საქართველო.
და აქ მოდის „მთავარი” არგუმენტი: კანონი ამბობს ასე და ასე.
კაცობრიობა იმიტომ ვითარდება, რომ დრომოჭმულ ან არაზნეობრივ კანონებს მუდმივად ცვლის და ახლებით ანაცვლებს. თუ კანონი ამბობს ასე, მაგრამ ეს კანონი ანტიჰუმანურია, დამამცირებელია, უზნეოა – საჭიროა შეიცვალოს კანონი!
გიორგისა და კაკოს ემუქრება 3-იდან 6 წლამდე პატიმრობა (სისხლის სამართლის კოდექსის 187-ე მუხლის მეორე ნაწილით გათვალისწინებულ დანაშაულს (სხვისი ნივთის დაზიანება ჯგუფურად). მათი დანაშაული ის არის, რომ ძალადობრივი გამოსახლების დროს, ადამიანისთვის დამამცირებელ სიტუაციასა და უმწეობაში, გააპროტესტეს ეს უზნეობა და კარების ნგრევისგან ყურადღების გადატანის მიზნით და უსამართლობის გაპროტესტებით ჩაამტვრიეს აღსრულების პოლიციის მანქანის ფანჯრები.
ისინი არ იქცეოდნენ გამიზნულად პოლიციის წინააღმდეგ. ეს არ იყო წინასწარი ჩანაფიქრი. მათ გააპროტესტეს გამოსახლების არაადამიანური ფორმები. ისინი მოქმედებდნენ საკუთარი და ადამიანური სინდისის კარნახით. ისინი ნაწილობრივ აღიარებენ, რომ გააკეთეს ეს, მხოლოდ იმ მიზნით, რომ ყურადღება გადმოეტანათ კორპუსსა და ბინაში ძალადობრივი შეჭრისგან.
ჩვენ მიგვაჩნია, რომ 3-იდან 6 წლამდე პატიმრობა ამ შემთხვევაში არის გაუგონარი დანაშაული, შეცდომა და დაცინვა. ჩვენ მიგვაჩნია, რომ ადამიანები, რომლებიც ძალადობას აღუდგებიან ასე „სამაგალითოდ” არ უნდა ისჯებოდნენ. მიგვაჩნია, რომ ამ სასჯელის შეფარდების შემთხვევაში ეს იქნება „სიგნალი” პატიოსანი ადამიანებისთვის, მათ „შესაშინებლად” და ეს იქნება ძალიან დიდი შეცდომა პროკურატურისა და სახელმწიფოს მხრიდან.
ჩვენ, საქართველოს მოქალაქეები, ვითხოვთ ღირსეულ, სამართლიან და ადამიანურ მოპყრობას.
ჩვენ, საქართველოს მოქალაქეები ვითხოვთ გიორგი ხასაიას და კაკო ჩიქობავას გათავისუფლებას!”, – ნათქვამია პეტიციის ტექსტში.
ჩიქობავა და ხასაია 23 იანვარს გამოსახლების წინააღმდეგ აქციაზე დააკავეს. მათ პროკურატურა აღსრულების ბიუროს მანქანის დაზიანებას ედავება. ბრალდებულებს აღკვეთის ღონისძიების სახით პატიმრობა აქვთ შეფარდებული.
