საქართველოს ეკონომიკისა და მდგრადი განვითარების მინისტრმა, ნათია თურნავამ ეკონომიკის განვითარების ხედვის – „ეკონომიკა – 2030“ პრეზენტაცია გამართა.
მან ისაუბრა სპეციალური პროგრამის შესახებაც, რომელიც ოჯახებისთვის საცხოვრებელი ბინების შეძენის ხელშეწყობას გულისხმობს.
საუბარია იპოთეკური სესხის პროცენტის თანადაფინანსებაზე იმ ოჯახებისთვის, ვისაც ეყოლება ახალშეძენილი შვილი და ბინის შეძენას გადაწყვეტენ. პროექტი – პროგრამა „აწარმოე საქართველოს“ ფარგლებში დაფინანსდება.
„განსაკუთრებულ აქცენტს ვაკეთებთ მრავალშვილიან ოჯახებზე, რაც ნიშნავს, რომ პირველი ან მეორე შვილის შეძენისას, დღევანდელი მოცემულობით, ჩვენ მიერ მოხდება ბინის შესაძენად აღებული სესხის სულ მცირე 6%-ის თანადაფინანსება, ხოლო მესამე ან ყოველ მომდევნო შვილის შემთხვევაში, საუბარია 8%-იან თანადაფინანსებაზე, რაც პრაქტიკულად ნიშნავს, რომ პროცენტის უდიდესი ნაწილი სახელმწიფოს მიერ იქნება გაღებული“, – ამბობს ნათია თურნავა.
მისი თქმით, ეს არის ძალიან მნიშვნელოვანი, მომავალზე ორიენტირებული პროგრამაა და მალე ამოქმედდება.
