შინაგან საქმეთა სამინისტროს განცხადებით, წუხელ მომხდარ ავტოსაგზაო შემთხვევასთან დაკავშირებით სამართალდამცავებმა სატვირთო მანქანის მძღოლი დააკავეს.
უწყების ცნობით, გამოძიებით დადგინდა, რომ 2020 წლის 30 ოქტომბერს თბილისი-სენაკი-ლესელიძის საავტომობილო გზის 77-ე კილომეტრზე დასავლეთის მიმართულებით მოძრავი სატვირთო ავტომანქანა სამგზავრო მიკროავტობუსს შეეჯახა.
შსს-ს განცხადებაში წერია, რომ აღნიშნული საგზაო სატრანსპორტო შემთხვევის შედეგად, ადგილზე გარდაიცვალა მიკროავტობუსის 5 მგზავრი, ხოლო 11 ადამიანმა სხვადასხვა ხარისხის სხეულის დაზიანება მიიღო. მოგვიანებით სამედიცინო დაწესებულებაში მეექვსე მგზავრი დაიღუპა.
შინაგან საქმეთა სამინისტროს თქმით, ავტოსაგზაო შემთხვევასთან დაკავშირებით გამოძიება საქართველოს სისხლის სამართლის კოდექსის 276-ე მუხლის მე-8 ნაწილით მიმდინარეობს. დანაშაული 6-დან 10 წლამდე ვადით თავისუფლების აღკვეთას ითვალისწინებს.
