ბათუმის საქალაქო სასამათლოში დაკითხეს ბრალდების მხარის მოწმე, პოლიციელი თამარ კერესელიძე, რომელმაც შეადგინა მზია ამაღლობელის დაკავების ოქმი და გაჩხრიკა ის.
პარალელურად სასამართლოს შენობასთან შეკრებილი მოქალაქეები სკანდირებდნენ: „თამარ კერესელიძე – მონა”, „თამარ კერესელიძე – ცრუ მოწმე”, „მონა ხარ”, „თამარ კერესელიძე – მოძალადე პოლიციელი ხარ”.
სასამართლო პროცესზე თამარ კერესელიძემ თქვა, რომ მზია ამაღლობელის დაკავების დროს ადგილზე არ ყოფილა.
„მე არ ვასრულებდი სამსახურეობრივ მოვალეობას, ერთ-ერთმა ხელმძღვანელმა დამირეკა, მაცნობა, რომ დაკავებული იყო ქალბატონი, მითხრა კონკრეტული მუხლი და ის, რომ უკვე შეყვანილი იყო ადმინისტრაციულ ნაწილში და ვინაიდან იყო მდედრობითი სქესის, იმავე სქესის პრინციპის დაცვით, იმავე სქესის გამომძიებლის მიერ მომხდარიყო დაკავების და ჩხრეკის ოქმის შედგენა. ჩვენს პრაქტიკაში პირად ჩხრეკას და ოქმის შედგენას იმავე სქესის წარმომადგენელი გამომძიებელი ახორციელებს”. – თქვა კერესელიძემ.
მისი თქმით, იყო სახლში, დაურეკეს დაახლოებით 01:00 საათზე და დაახლოებით 30 წუთში გამოცხადდა სამსახურში. ამ დროს, როგორც კერესელიძემ თქვა, მზია ამაღლობელი სახალხო დამცველთან გადიოდა კონსულტაციას.
„დაახლოებით 15 წუთის შემდეგ მართლწესრიგის თანამშრომელი 2 ქალბატონის თანხლებით ამოიყვანეს პირველი სართულიდან მესამე სართულზე, ჩემს კაბინეტში, სადაც დერეფანში შევხვი და იმყოფებოდა ჩემი თვალთახედვის ქვეშ”. – თქვა მან.
მზია ამაღლობელის ადვოკატმა კერელიძეს ჰკითხა, რამდენად ხშირია მის პრაქტიკაში შემთხვევები, როცა სხვა პირი აკავებს ადამიანს და „ის მიდის და ადგენს ოქმს ისე, რომ დაკავების პროცესს არ შესწრებია”.
„ვერ ვიტყვი, რომ ყოველთვიურად ხდება, თუმცა, საკმაოდ მქონია შემთხვევები”. – ამბობს თამარ კერესელიძე.
ადვოკატმა მას განუმარტა სისხლის სამართლის საპროცესო კოდექსის ჩანაწერი, რომლის თანახმადაც, დაკავების ოქმი უნდა შეადგინოს „დამკავებელმა მოხელემ”.
კერესელიძე „დამკავებელი მოხელე” არ ყოფილა. ადვოკატმა იკითხა, რამ შეუშალა ხელი უშუალოდ დამკავებელ პოლიციელს.
კერესელიძემ ისევ თქვა, რომ ჩხრეკა ხდება ბრალდებულის სქესის მიხედვით. გამომძიებელი ამბობს, რომ „არ არის იმპერატიული მოთხოვნა, ვინც დააკავა, იმან შეადგინოს ოქმი”.
თამარ კერესელიძემ ასევე თქვა, რომ მზია ამაღლობელს ბორკილები თავად დაადო.
მან უპასუხა მზიას მიერ პროცესზე დასმულ კითხვას, ვინ მისცა მას ხელბორკილების გამოყენების ბრძანება.
„ბრძანება ხელბორკილების დადებასთან დაკავშირებით არც ხდება და არც ამ კონკრეტულ შემთხვევაში არ ყოფილა. იქიდან გამომდინარე, რომ პირი უკვე დაკავებული იყო, ოქმიც შედგენილი.. ხელბორკილის დადებაც, ბუნებრივია [ჩემი გადაწყვეტილება იყო], იმიტომ, რომ ოქმს მე თვითონ ვადგენ, პირი მე უნდა გადავიყვანო იზოლატორში და ხელბორკილიც მას უნდა დაედოს. ეს, რა თქმა უნდა, არ არის სავალდებულო ზოგ შემთხვევაში, პოლიცია თავისი დისკრეციიდან გამომდინარე იყენებს ამას. თუმცა, ვინაიდან ბადრაგირების პროცესი უნდა დაწყებულიყო, ხელბორკილი აუცილებელია”.
კერესელიძემ ასევე თქვა, რომ ხელბორკილები ერთ-ერთმა ბადრაგმა შეუტანა, ხოლო თავად მზიას ხელებიზურგსუკან შეუკრა.
გამომძიებლმა დაადასტურა, რომ მზია ამაღლობელს მისთვის წინააღმდეგობა არ გაუწევია. თუმცა, ამავე დროს, ბორკილების ერთ-ერთ არგუმენტად პოლიციელების უსაფრთხოება მოიყვანა.
„ხელბორკილს წყლის დალევაში ხელი არ შეუშლია. თქვენ ხელბორკილები მოგხსნეს წყლის დალევის დროსაც და საპირფარეშოში გასვლის დროსაც”. – თქვა თამარ კერესელიძემ.
გამომძიებელისვე თქმით, მზია ამაღლობელს ხელბორკილები ოქმის შედგენის პროცესის განმავლობაში, დაახლოებით 2 საათის განმავლობაში ედო.
დღეს ბათუმის საქალაქო სასამათლოში ასევე გამოკითხეს მზია ამაღლობელის დამკავებელი პოლიციელი ბერდია ფერაძე.
მანამდე კი იმსჯელეს მტკიცებულებების დასაშვებობაზე.
შემდეგი სასამართლო სხდომა 7 აპრილს, 13:00 საათზე დაინიშნა.
