ტელეკომპანია POS TV განცხადებას ავრცელებს, რომელშიც აღნიშნავს, რომ გუნდმა მიიღო გადაწყვეტილება, ღიად და აქტიურად დაუჭირონ მხარი ახლად შექმნილ საზოგადოებრივ მოძრაობა „ხალხის ძალას“.
როგორც განცხადებაშია აღნიშნული, არხი დღეიდან მოძრაობა „ხალხის ძალის“ მედიაპლატფორმა ხდება.
„ძვირფასო მეგობრებო, დაარსების დღიდან ჩვენი ტელევიზია ღიად და დაუფარავად აცხადებდა თავისი მიზნებისა და ამოცანების შესახებ. ჩვენს უპირატესობად ვთვლით, რომ მაყურებელს პატიოსნად ვეუბნებოდით, თუ ვის და რა იდეას ვუჭერდით მხარს. ასევე, თავიდანვე ცხადი იყო ის იდეოლოგიური პლატფორმა, რომელზეც არხი იდგა. ჩვენი გულწრფელობა დაფასდა და ძალიან დიდი მადლიერებით გვინდა აღვნიშნოთ, რომ დღითიდღე იზრდება ჩვენი არხის ერთგული მაყურებლის რიცხვი და შესაბამისად რეიტინგიც.
ახალ დროს ახალი გამოწვევები მოაქვს. ჩვენი უცვლელი პრინციპია, ვემსახუროთ ხალხს და ქვეყანას იქ, სადაც სიმართლეა და ისე როგორც ჩვენ გვწამს.
ამიტომაც, „POS TV“-ის გუნდმა მივიღეთ გადაწყვეტილება, ღიად და აქტიურად დავუჭიროთ მხარი ახლადშექმნილ საზოგადოებრივ მოძრაობა „ხალხის ძალას“. მიგვაჩნია, რომ მათ მიერ გაცხადებული მიზანი, ქართველმა ხალხმა გაიგოს მეტი სიმართლე, ამ რთულ და ფეთქებადსაშიშ გეოპოლიტიკურ ვითარებაში, ემთხვევა ჩვენი არხის შექმნის იდეას. არხი დღეიდან ხდება მოძრაობა „ხალხის ძალას“ მედიაპლათფორმა, ჩვენი არხის რამდენიმე სახე უშუალოდ გახდა ორგანიზაციის წევრი. არხს ჰყავს ახალი დამფუძნებელი, არხის საკონტროლო პაკეტი ეკუთვნის ვიქტორ ჯაფარიძეს, რომელთანაც გვაქვს სრული იდეოლოგიური თანხვედრა. ღრმად გვწამს, რომ ამ ნაბიჯების გადადგმით ჩვენს წვლილს შევიტანთ საქართველოს უკეთესი მომავლის შექმნაში”, – ნათქვამია განცხადებაში.
დეპუტატმა ვიქტორ ჯაფარიძემ, რომელიც „ქართული ოცნებიდან“ წასულ დეპუტატებს შეუერთდა, ტელეკომპანია POSTV-ის 52%-იანი წილი შეიძინა. ამის შესახებ დღეს მოძრაობა „ხალხის ძალის“ დამფუძნებელმა, სოზარ სუბარმა განაცხადა.
