სისხლის სამართლის საერთაშორისო სასამართლოს პროკურორმა, ქარიმ ხანმა სასამართლოს ისრაელის პრემიერ-მინისტრ ბენიამინ ნეთანიაჰუს, ისრაელის თავდაცვის მინისტრ იოავ გალანტის, ასევე ტერორისტული დაჯგუფება „ჰამასის” 3 ლიდერის: მუჰამედ დიაბ იბრაჰიმ ალ-მასრის, იაჰია სინვარის და ისმაილ ჰანიეჰის დაკავების ორდერისთვის მიმართა.
მიზეზი 7 ოქტომბერს ისრაელში მომხდარი ტერორისტული თავდასხმა და მას შემდეგ პალესტინაში მიმდინარე ომია.
ხანის განცხადებით, სინვარის, ჰანიესა და ალ-მასრის წინააღმდეგ წაყენებული ბრალდებები მოიცავს „განადგურებას, მკვლელობას, მძევლების აყვანას, გაუპატიურებას და სექსუალურ ძალადობას პატიმრობაში“.
ეს პირველი შემთხვევაა, როცა ICC-მა აშშ-ის ახლო მოკავშირის ლიდერების დაკავების ორდერები მოითხოვა.
ახლა ბენიამინ ნეთანიაჰუ ვლადიმირ პუტინთან ერთად არის სისხლის სამართლის საერთაშორისო სასამართლოს სამიზნე.
ქარიმ ხანის მიმართვას ICC-ის მოსამართლეები განიხილავენ და გადაწყვეტილებას გამოიტანენ.
