დღეს ქუთაისში, ფსიქოლოგიური მომსახურების ცენტრის შენობაში ბენეფიციარებსა და თანამშრომლებს მეზობლები არ უშვებდნენ.
ცენტრი „ღია სახლი“ ფსიქოლოგიურ სერვისები უფასოა შშმ ბავშვებისთვის. სერვისი სახელმწიფო პროგრამების ფარგლებში ფინანსდება.
„ხშირად აღნიშნავენ მეზობლები, რომ არასასიამოვნოა მათთვის „ასეთი ბავშვების“ ყურება. ასე განმარტეს ჩვენთვის ჭიშკრის ჩაკეტვის მიზეზი“, – განაცხადა „ღია სახლის“ თავმჯდომარე ნინო კილაძემ „ბათუმელებთან“.
მოგვიანებით ნინო კილაძემ საკუთარ Facebook-გვერდზე დაწერა, რომ პატრულის დახმარებით „ღია სახლის“ სამუშაო სივრცეში შესვლა მოხერხდა.
„რადგან ბევრი ადამიანი გვწერს და მხარსგვიჭერს, მინდა გაცნობოთ, რომ პატრულის დახმარებით მოხერხდა „ღია სახლის“ სამუშაო სივრცეში შესვლა. მადლობა მინდა გადავუხადო სწრაფი რეაგირებისთვის მადონა ბასილაძესა და ნათია წივწივაძეს იქვე ადგილზე გაჩდნენ.
ბოდიში მინდა მოვუხადო იმ ბავშვებს და მშობლებს, რომელთაც ქუჩაში მოუწიათ ყოფნა და შესაბამისად სერვისიც ვერ მიიღეს.
ვწუხვარ, რომ ასეთი უსიამოვნო რეპლიკების მოსმენა უწევდათ, რაც ძალიან დამთრგუნველი იყო. მჯერა, რომ შევძლებთ ისეთ საზოგადოებაში ცხოვრებას სადაც მეზობლები, გამვლელები არ გაჩერდებიან და დაგვარიგებენ, როგორ უნდა გამოვკეტოთ სახლში ბავშვები ან ქალაქის გარეუბანში უნდა ვიყოთ. ჩვენ ბევრს ვიხმაურებთ და ეს ბავშვები სულ მალე ქალაქის ცენტრში მათი ტკბილი ხმებით დაგვატკბობენ.
მადლობა „ღია სახლის“ მთელ გუნდს, რომ საოცარი სიმშვიდე შეინარჩუნეთ ველური შემოტევის ფონზე“, – წერს ნინო კილაძე.
„პუბლიკა“ მომხდარზე დეტალების დასაზუსტებლად შინაგან საქმეთა სამინისტროს დაუკავშირდა და ინფორმაციას მიღებისთანავე შემოგთავაზებთ.
