მეხუთე პრეზიდენტმა, სალომე ზურაბიშვილმა დღეს, პირველ აპრილს, ოპოზიციურ პარტიებთან შეხვედრის შემდეგ თქვა, რომ „ის კოორდინაცია, რომელიც თავისი წესებით გუშინ გამოცხადდა, დღეს შედგა“.
გუშინ აქციაზე ზურაბიშვილმა თქვა, რომ პლატფორმის მთავარი პრინციპი ის არის, რომ იგი ღიაა ყველა პროევროპული პარტიისა და ჯგუფისთვის, ვინც პროტესტის მოთხოვნებს იზიარებს.
ზურაბიშვილს არ დაუკონკრეტებია რომელ პარტიებს შორის შედგა დღეს შეთანხმება. „ფედერალისტების“ ლიდერმა, თამარ ჩერგოლეიშვილმა შეხვედრის შემდეგ თქვა:
„აქამდე პოლიტიკური სპექტრი დადიოდა მოჯადოებულ წრეზე და ცდილობდა შეთანხმების მიღწევს იქ, სადაც ვერ თანხმდება. არა „ქართულ ოცნებასთან“, არამედ საკუთარ თავთან მარცხდებოდა. ახალი სალომე ზურაბიშვილის ინიციატივაში არის ის, რომ ის ცდილობს ამ მოჯადოებული წრის გარღვევას და შეთანხმებების მიღწევას და ძალისხმევის გაერთიანებას იქ, სადაც ეს გამოდის“.
„დროას“ ლიდერის, ელენე ხოშტარიას თქმით, კოორდინაციის გაღრმავება არის არა უბრალოდ სასარგებლო, არამედ ყველა პოლიტიკური აქტორის ვალდებულება, რომ საზოგადოებას ბევრად უფრო კოორდინირებული მოქმედება შესთავაზონ.
განცხადება გაავრცელა „დროამ”. პარტიამ მიუთითა, რომ პროდასავლური პარტიების შეთანხმებული მუშაობა საქართველოს ეროვნული ინტერესების დასაცავად მათთვის ყოველთვის მნიშვნელოვანი იყო.
თუმცა, „სტრატეგიულ პრობლემად მიაჩნია ადგილობრივი თვითმმართველობის არჩევნებში მონაწილეობაზე უარის შესახებ მკაფიო საერთო პოზიციის არარსებობა”.
„ჩვენ ვიყავით და ვართ საგარეო ურთიერთობებში ერთობლივი სტრატეგიით მოქმედების, პროტესტის ერთობლივად დაგეგმვის, არათუ მონაწილე, ხშირ შემთხვევაში ინიციატორი. ამ საკითხებზე კოორდინირებულ ძალისხმევას მომავალშიც დავუჭერთ მხარს.
სტრატეგიულ პრობლემად მიგვაჩნია ადგილობრივი თვითმმართველობის არჩევნებში მონაწილეობაზე უარის შესახებ მკაფიო საერთო პოზიციის არარსებობა. ჩვენ ვთვლით, რომ ადგილობრივი არჩევნების ბოიკოტი დღესვე, არის წინ გადადგმული დიდი ნაბიჯი ახალი საპარლამენტო არჩევნების მოსაპოვებლად და ივანიშვილის რეჟიმის საბოლოო დელეგიტიმაციისთვის.
ამ საკითხზე საერთო პოლიტიკური პოზიცია კი უმნიშვნელოვანესია პარტიებს შორის სტრატეგიული ერთიანობის ჩამოყალიბებისთვის”. – წერია პარტიის განცხადებაში.
მედიასთან ასევე ისაუბრეს „ლელოს“ ლიდერმა, ბადრი ჯაფარიძემ, „სტრატეგია აღმაშენებლის“ ლიდერმა, გიორგი ვაშაძემ და „ევროპული საქართველოს“ ლიდერმა, გიგი წერეთელმა – ისინი ამ პლატფორმას უერთდებიან.
სოციალურ ქსელში განცხადება გამოაქვეყნა „ახალის“ ლიდერმა და თქვა, რომ პარტია „მზადაა იმოქმედოს კოორდინაციის რეჟიმში პროდასავლურ აქტორებთან, მხოლოდ იმ დათქმით, რომ არ დარჩება ბუნდოვანება, რაც პოტენციურად შესაძლოა გახდეს ივანიშვილის რეჟიმის ლეგიტიმაციის საფუძველი“.
„პარტია „ახალი“ ყოველთვის მისცემს შანსს კოორდინაციას და ერთიან ქმედებებს საქართველოს ინტერესებში. მაგრამ ფუნდამენტურ საკითხზე – სრული ართანამშრომლობა რეჟიმთან, მათ შორის: ადგილობრივი თვითმმართველობის არჩევნებში მონაწილეობაზე უარი, არალეგიტიმურ კომისიებში სიარულზე უარი და მსგავს ქმედებებზე მკაფიო და ცალსახა უარის გარეშე, მეტიც, შეთანხმებაზე ხელმოწერაზე უარი სწორედ ამ საკითხებზე მკაფიო ჩანაწერის გამო, რასაც მოჰყვა პრეზიდენტ ზურაბიშვილის გადაწყვეტილება, რომ ერთი კონკრეტული პარტიის (გახარია საქართველოსთვის) უარის გამო, ეს საკითხები საერთოდ არ დაფიქსირებულიყო წინააღმდეგობის პლატფორმის სადამფუძნებლო დოკუმენტში, არ მიგვაჩნია გამართლებულად“, – დაწერა ნიკა გვარამიამ.
რაც შეეხება პარტიას „გახარია საქართველოსთვის“ – ანა ბუჩუკურის თქმით:
„ამ ორ საკითხზე, პოლიტიკური პატიმრების გათავისუფლება და ევროინტეგრაციის, ევროპული მომავლის დაცვა, კოორდინაცია ამ ორ საკითხზე ჩვენთვის მისაღებია“.
„გირჩი მეტი თავისუფლების“ ლიდერი, ზურა ჯაფარიძე აცხადებს, რომ ძალების გაერთიანების ნებისმიერი მცდელობის მომხრეა. ჯაფარიძის აზრით, მთავარი ჰგონია პრინციპულ საკითხებზე შეთანხმება, მაგალითად რაიმე ნაბიჯით „რეჟიმისთვის ლეგიტიმაციის არმიცემაზე“, ასევე „რეჟიმის დამარცხების სტრატეგიაზე“ ერთიანი პოზიციის ჩამოყალიბება.
„გუშინ რაც ისაუბრა სალომე ზურაბიშვილმა, რომ ორი მოთხოვნაა რაზეც შეჯერებული ვართ: ა) ახალი საპარლამენტო არჩევნები და ბ) პოლიტპატიმრების გათავისუფლება, ორივე მოთხოვნას ვიზიარებ. ასევე, სადაც უკვე არსებობს კოორდინაციის პრაქტიკა რომელიც მუშაობს, მაგალითად საგარეო ფრონტზე, მანდაც ჩართული ვარ. თუ რამე ახალი მიმართულება გაჩნდება, სადაც შესაძლებელი იქნება კოორდინაცია (ნეტავ), არც იქ ჩართვის პრობლემა მაქვს.
თუმცა მთავარი და სასწრაფო მგონია:
1. პრინციპულ საკითხებზე შეთანხმება (მაგ. რეჟიმისთვის ლეგიტიმაციის არ მიცემა რაიმე ნაბიჯით) 2. რეჟიმის დამარცხების გზაზე/სტრატეგიაზე ერთიანი, გასაგები პოზიციის ჩამოყალიბება, რომელსაც მოქალაქეებს ავუხსნით და მერე მათთან ერთად შევასრულებთ“, – წერს ის.
სოციალურ ქსელში განცხადება გაავრცელა „ნაციონალური მოძრაობის“ თავმჯდომარე, თინა ბოკუჩავამაც და თქვა, რომ პარტია არ ემიჯნება არცერთ ფორმატს, რომელიც მიზნად ისახავს ერთობლივ ოპოზიციურ მუშაობას „ივანიშვილის რეჟიმის დასამარცხებლად“.
მისი განცხადებით, „ერთიანი პოზიციები არ არსებობს ოპოზიციაში ისეთ ფუნდამენტურ საკითხებზე როგორიცაა 2008 წლის ომის კომისია და პარტიების აკრძალვა და ადგილობრივი თვითმმართველობის არჩევნები“.
„სალომე ზურაბიშვილს ჰქონდა მყარი პოზიცია ადგილობრივ თვითმმართველობის არჩევნებში მონაწილეობის დაუშვებლობასთან დაკავშირებით, მაგრამ აქაც, შეიცვალა აზრი გახარიას პოზიციის გათვალისწინებით. ვითანამშრომლებთ აღნიშნულ ფორმატთან საკითხების მიხედვით საჭიროების შესაბამისად (ad hoc საფუძველზე). იქნება საუბარი ადგილობრივ თვითმმართველობის არჩევნებში მონაწილეობის დაუშვებლობაზე პოლიტპატიმრების გათავისუფლების და საპარლამენტო არჩევნების ჩანიშვნამდე? ცხადია, შევუერთდებით ფორმატს. მაგრამ დღეს, როდესაც ივანიშვილის რეჟიმი აუქმებს სახელმწიფოს და რუსეთს გვაბარებს არ არის ამდენი დასაკარგი დრო ფორმატებში, რომელიც ილუზორული და ცერემონიალურია“, – წერს ბოკუჩავა.
„პუბლიკა“ დაუკავშირდა „თავისუფლების მოედანსაც“, პარტიაში გვითხრეს, რომ ითანამშრომლებენ ნებისმიერ იმ ძალასა თუ გაერთიანებასთან, რომელიც საკუთარ წვლილს შეიტანს „თავისუფლების დაცვის საქმეში – მათ შორის სალომე ზურაბიშვილის პლატფორმასთან“.
