ჟურნალი Byline Times აქვეყნებს სტატიას კორუფციული სკანდალის შესახებ, რომელშიც ისინი გამოკვეთენ სანქცირებული რუსი ოლიგარქის, რომან აბრამოვიჩისა და ტელეკომპანია „იმედის“ მფლობელის, ირაკლი რუხაძის საინვესტიციო ჰოლდინგის Hunnewell Partners-ის სავარაუდო კავშირს.
საუბარია კორუფციულ სკანდალზე, რომელშიც უზბეკეთის ყოფილი პრეზიდენტის, ისლამ ქარიმოვის შვილი, გულნარა ქარიმოვა ფიგურირებს – ბრალდებების თანახმად, უზბეკეთის ბაზარზე წვდომის სანაცვლოდ, ქარიმოვას ორგანიზაციები იღებდნენ ქრთამს რამდენიმე უმსხვილესი სატელეკომუნიკაციო კომპანიისგან, რომელთაგან ერთ-ერთი იყო რუსული Mobile Telesystems (MTS).
მას შემდეგ, რაც კორუფციული სკანდალის შესახებ ცნობებმა გაჟონა, ინვესტორებმა MTS-ს უჩივლეს – სტატიაში ნათქვამია, რომ ამ დავას სათავეში ჩაუდგა რუხაძის საინვესტიციო კომპანია Hunnewell Partners, რომელიც აშშ-ის სასამართლოში ასაჩივრებდა იმ დანაკარგებს, რომლებიც თითქოსდა რუსეთის სატელეკომუნიკაციო კომპანიაში ინვესტიციით მიადგა. როგორც Byline Times წერს, სინამდვილეში რუხაძის კომპანიას არ განუცდია დანაკარგები და ის რეალურად რომან აბრამოვიჩის კომპანიის ინტერესების სასარგებლოდ მოქმედებდა.
სტატიის თანახმად, ქარიმოვას კონტროლირებადი ორგანიზაციებისთვის გადახდილ ქრთამებს შორის, ყველაზე მეტი, 420 მილიონი დოლარი MTS-მა გადარიცხა. სკანდალის შემდეგ, სასამართლო პროცესების თავიდან აცილების მიზნით, MTS-მა 2019 წელს აშშ-ის ფინანსურ უწყებებთან შეთანხმებას მიაღწია და 850 მილიონი დოლარის ჯარიმა გადაიხადა.
ამ შეთანხმების მიუხედავად, ბრალდებების გამო კომპანიის აქციების ფასი არაერთხელ მნიშვნელოვნად დაეცა, რის შედეგადაც ინვესტორმა კომპანიებმა თანხები დაკარგეს – შესაბამისად, მათ MTS-ის წინააღმდეგ სასამართლოში სარჩელი წარადგინეს. სტატიაში აღნიშნულია, რომ ერთ-ერთი მოსარჩელე სწორედ Hunnwell Partners იყო, რომელიც 13 მილიონი დოლარის ზარალზე საუბრობდა. 2021 წელს სასამართლომ კომპანიების სარჩელები არ დააკმაყოფილა.
Byline Times მოპოვებულ დოკუმენტებზე დაყრდნობით წერს, რომ სანამ Hunnewell MTS-ის წინააღმდეგ სარჩელს შეიტანდა, მან აბრამოვიჩის კვიპროსულ კომპანიასთან Pro-Alpha Investments Ltd.-თან შეთანხმება გააფორმა – ამ შეთანხმებით, Hunnewell იმოქმედებდა როგორც Pro-Alpha-ს წარმომადგენელი, ხოლო ეს უკანასკნელი სარჩელში არ გამოჩნდებოდა როგორც მომჩივანი მხარე. აბრამოვიჩის კომპანია Hunnewell საბოლოო მოგებიდან 10%-ს მიიღებდა.
სტატიაში აღნიშნულია, რომ Hunnewell-ის წარმომადგენელმა MTS-ის სარჩელი „აბსოლუტურად ჩვეულებრივ სამართლებრივ დავად“ შეაფასა და განაცხადა, რომ აბრამოვიჩთან კავშირი არასდროს ჰქონიათ. ამასთან, როგორც კომპანიის წარმომადგენელმა გამოცემასთან აღნიშნა, იმ დროისთვის, როცა შეთანხმება შედგა, აბრამოვიჩი ბრიტანეთის მიერ სანქცირებული არ ყოფილა – ისინი უარყოფენ მისი შესაძლო ჩართულობის შესახებ ინფორმაციის ფლობასაც.
