რატომ დაიხურა საზმაუს გადაცემა „კინოკლუბი“ - გადაცემის ავტორმა მიზეზზე ისაუბრა

საზოგადოებრივი მაუწყებლის გადაცემა „კინოკლუბის“ ავტორი და რეჟისორი სალომე რაზიკაშვილი „მედიაჩეკერთან“ ინტერვიუში ამბობს, რომ გადაცემა მას შემდეგ დაიხურა, რაც ქართული ფილმის, „კომეტების“ თიზერმა ჰომოფობიური ჯგუფის აღშფოთება გამოიწვია.

ინტერვიუში სალომე რაზიკაშვილმა განმარტა, რომ „კინოკლუბის“ მომზადებისას ფილმების სიასა და თემებს წინასწარ ათანხმებდა.

ერთ-ერთი გადაცემის თემა თამარ შავგულიძის ფილმი „კომეტები“ იყო, გადაცემის სტუმარი კი – მთავარი როლის შემსრულებელი მსახიობი, ნინო კასრაძე.

„კომეტები“ (2019) ორი ქალის ბავშვობის დროინდელ მეგობრობასა და სიყვარულის შესახებაა.

რაზიკაშვილის თქმით, გადაცემაში ნინო კასრაძემ თქვა ფრაზა, რომელიც შემდეგ თიზერშიც ჩასვეს: „ჩვენ არ შეიძლება, ვღელავდეთ სხვა ადამიანის სექსუალურ ორიენტაციაზე, არაჯანსაღია, რომ ჩვენ ვრეაგირებთ სხვა ადამიანის პირად ცხოვრებაზეო“.

„გადაცემის გასვლამდე ყოველთვის 2-3 თიზერი მზადდებოდა და მთელი კვირის განმავლობაში ტრიალებდა. ველოდი, რომ რაღაც ტიპის გამოხმაურება მოჰყვებოდა. ასეც მოხდა. გურამ ფალავანდიშვილმა, ნიკოლოზ მჟავანაძემ და მათმა თანამოაზრეებმა გადაცემის ეთერში გასვლის [2023 წლის 11 თებერვალი] შემდეგ თიზერი გადააზიარეს და საოცარ კომენტარებს წერდნენ.

მერე „პირველი არხის“ შენობასთანაც მოვიდნენ და იქ ყვიროდნენ.

ამის შემდეგ მდგომარეობა საკმაოდ დაიძაბა, დაიწყო ლაპარაკი გადაცემის დახურვაზე და მიუხედავად იმისა, რომ წინასწარ ჩაწერილი კიდევ 4 გადაცემა გვქონდა, გადაცემა დაიხურა და აღარც ერთი მათგანი ეთერში აღარ გასულა.

ერთ-ერთი გადაცემის სტუმარი ლანა ღოღობერიძე იყო, რომელიც ძალიან საინტერესო გამოვიდა და იმ გადაცემაზე გული განსაკუთრებით მწყდება“, – ამბობს სალომე რაზიკაშვილი.

შეკითხვაზე, რა დაასახელეს გადაცემის დახურვის მიზეზად, ის პასუხობს, რომ „არაფერი“.

„არც რუსიკო მანჯგალაძესთან და არც თიკო ბერძენიშვილთან არანაირი კომუნიკაცია არ მქონია. ვისაც ფილმი ნანახი აქვს, იცის, რომ იქ არაფერია ისეთი, რაც, თუნდაც გამოსადავებლად შეიძლება ვინმემ პროპაგანდად ჩათვალოს. თანაც გადაცემა 21:00 საათზე იწყებოდა და ასეთი წყობა ჰქონდა: ჯერ წამყვანის სიტყვა იყო, შემდეგ სტუმრის სიტყვა, ფილმი და ბოლოს კითხვა-პასუხი. თიზერში გავრცელებულმა ნინო კასრაძის სიტყვებმა – „სექსუალური ორიენტაცია“ კი ეს ამბავი გამოიწვია. მიუხედავად ამისა, იმიტომ რომ „ტელესკოლის“ პროდიუსერი, თამუნა ციციშვილი ნამდვილად ძალიან კარგი გოგო იყო, რაღაცნაირად მას ანგარიში გავუწიე და სკანდალი მე არ ამიტეხია“, – თქვა მან.

მისივე ინფორმაციით, ამ გადაცემის ჩანაწერი „პირველი არხის“ იუთუბიდან წაიშალა.

„თითქოს, უნდოდათ, რომ სხვა გადაცემაზე მემუშავა, მაგრამ საბოლოოდ, ვერ შევთანხმდით და გამომიშვეს. ადგილი, სადაც ასე გავიწროებენ, გიკონტროლებენ საქმეს და პირდაპირი მნიშვნელობით, ხელოვნებას აცენზურებენ, იქ მუშაობა სასიამოვნო აღარც ჩემთვის იქნებოდა. რაღაც დროის შემდეგ, ამ გადაცემის ნახვა მინდოდა, ვეძებე და ვერ ვიპოვე. წაშლილი აღმოჩნდა. რატომ წაშალეს, არ ვიცი. ისიც კი არ მითხრეს, წავშალეთო“, – ამბობს ის.

„პუბლიკა“ ამ ინფორმაციის გადამოწმებას საზოგადოებრივი მაუწყებლის მენეჯმენტთან ცდილობს და პასუხის შემთხვევაში მასალა განახლდება.

განახლება

„პუბლიკა“ ესაუბრა საზოგადოებრივი მაუწყებლის მედიის დირექტორს, რუსუდან მანჯგალაძეს, რომელიც ამბობს, რომ არც გადაცემა ახსოვს და არც მისი დახურვის მიზეზზე იცის.

„არ მახსოვს ასეთი გადაცემა. დიდი ხნის წინ იყო, მარტო „ტელესკოლა“ რამდენი ხნის დახურულია… არ მახსოვს კარგად ეს გადაცემა და არც საქმის კურსში ვარ, რაზე მეკითხებით. იქ ძალიან ბევრი პატარა პროექტი იყო, რომელიც იხსნებოდა-იხურებოდა. არხს ჰყავდა თავისი ხელმძღვანელი, თამარ ციციშვილი. სალომე რაზიკაშვილი, ბუნებრივია, ძალიან კარგად მახსოვს, ჩემი მეგობრის შვილია, მაგრამ ვერ გეტყვით, ზუსტად რომ გითხრათ, რამე ინციდენტი ყოფილიყო, სალომეს ჩემთან კომუნიკაციის პრობლემა არასდროს ჰქონია და ალბათ მაშინვე შემატყობინებდა ამის შესახებ.

იქ იყო ძალიან ბევრი პროექტი, რომელიც იხურებოდა და 2023 წლიდან არხი არ არსებობს. უნდა მოგატყუოთ, რომ გითხრათ, რომელიმე პროექტი იქიდან მახსოვს ან რატომ დაიხურა…

ეს [გადაცემა „კომეტების“ შესახებ] „ტელესკოლაზე“ გავიდა, საბავშვო არხზე? ჰო, ნუ საბავშვო არხი იყო, ბავშვებისთვის განკუთვნილი არხი იყო, როცა შეიქმნა… არ მახსოვს, სიმართლე გითხრათ.

არ მახსენდება [მჟავანაძე-ფალავანდიშვილს] რომელიმე გადაცემასთან დაკავშირებით ჰქონოდათ აქცია. არხის ხელმძღვანელი ყოველთვის იბარებდა გადაცემას. ამ გადაცემასაც ის ჩაიბარებდა, თუ რამე არ მოეწონებოდა, მისცემდა შენიშვნას. როგორც ჩანს, ვერავინ ვერ ნახა ვერაფერი პრობლემატური. არ მგონია, ეს მიზეზი ყოფილიყო ამ ყველაფრის. მით უმეტეს, სალომე ჩვენთან კიდევ დიდხანს მუშაობდა და არაერთ პროექტზე იყო, რამე პრობლემა რომ ყოფილიყო, დაგველაპარაკებოდა და გვეტყოდა“, – გვითხრა მან.