სატელეფონო გამოკითხვის შედეგებში, რომელსაც ინფორმაციის თავისუფლების განვითარების ინსტიტუტი (IDFI) აქვეყნებს, ნათქვამია, რომ საქართველოს მოსახლეობას განსხვავებული დამოკიდებულება აქვს საქართველოს პროკურატურის მიმართ: მოსახლეობის ნახევარზე მეტი ენდობა პროკურატურას, მეოთხედზე მეტი კი ფიქრობს, რომ ის არაობიექტურად მიმართავს ქონების ჩამორთმევასთან დაკავშირებულ სამართლებრივ დევნას.
ამასთანავე, უმრავლესობამ საერთოდ არ იცის, რამდენად ობიექტურია ან არაობიექტური პროკურატურა ქონების ჩამორთმევასთან დაკავშირებული სამართლებრივი დევნისას. ასევე, მოსახლეობის დაახლოებით მესამედმა არ იცის, ხშირად, იშვიათად თუ არასდროს იყენებენ პროკურორები ძალაუფლებას ბოროტად, ურიგდებიან მოსამართლეებს ან მთავრობის წარმომადგენლებს მათთვის სასარგებლო გადაწყვეტილების მისაღებად. მოსახლეობის დაახლოებით ნახევარი მიიჩნევს, რომ ეს ხშირად ან იშვიათად ხდება, ხოლო დაახლოებით მეათედი – რომ ეს არასდროს ხდება.
სატელეფონო გამოკითხვა 4-დან 23 მარტამდე პერიოდს მოიცავს. მთლიანობაში შეგროვდა 755 დასრულებული ინტერვიუ. შედეგები წარმომადგენლობითია საქართველოს სრულწლოვანი ქართულენოვანი მოსახლეობისთვის.
2020 წლის 19 იანვარს, „სტუდია მონიტორისა“ და „რადიო თავისუფლების“ ვებგვერდებსა და ფეისბუქგვერდებზე ჟურნალისტური გამოძიების ფარგლებში განთავსდა ფილმი: „გამარჯვებულთა სამართალი“. იგი ეხებოდა 2011 წელს სახელმწიფოს მიერ ბიზნესმენ დავით ბეგიაშვილისთვის ქონების, კერძოდ კი, ბრენდული საათების მაღაზია „ალბატროსის“, ჩამორთმევას და პროკურატურის მიერ ამ საქმის გამოუძიებლობის ბრალდებას.
2020 წლის 4-დან 23 მარტამდე პერიოდში CRRC-საქართველომ სატელეფონო გამოკითხვა აწარმოა იმისათვის, რომ გაეგო საქართველოს მოსახლეობის დამოკიდებულება პროკურატურის მიმართ და ასევე დაედგინა, მოსახლეობის რა ნაწილმა ნახა „სტუდია მონიტორისა“ და „რადიო თავისუფლების“ ფილმი.
