რუსეთის ფედერაციის გენერალური პროკურატურა სასამართლოს სთხოვს, აღიაროს კომპანია Meta ექსტრემისტულ ორგანიზაციად და აკრძალოს მისი საქმიანობა რუსეთში. ინფორმაციას რუსეთის პროკურატურა ავრცელებს. პროკურატურამ გადაწყვეტილება მას შემდეგ მიიღო, რაც კომპანია Meta-მ შეცვალა სიძულვილის ენის შემცველი პოსტების წესები რუსეთთან მიმართებით.
„აღძრულია სისხლის სამართლის საქმე… რუსეთის ფედერაციის მოქალაქეების მიმართ ძალადობისა და მკვლელობის უკანონო მოწოდებებთან დაკავშირებით, ამერიკული კომპანია Meta-ს თანამშრომლების მიერ, რომელიც ფლობს სოციალურ ქსელებს Facebook-სა და Instagram-ს“, – აცხადებენ რუსეთის საგამოძიებო კომიტეტში.
როგორც Reuters წერს, Meta-ს პრესსამსახურის წარმომადგენელმა ხუთშაბათს განაცხადა, რომ კომპანია Meta-მ შეამსუბუქა პოლიტიკური განცხადებების შესახებ წესები, ისეთი, როგორიც არის „სიკვდილი რუს დამპყრობლებს“. თუმცა მან აღნიშნა, რომ წესები არ შემსუბუქებულა რუსეთის მშვიდობიანი მოსახლეობისადმი ძალადობის შემცველი პოსტებისთვის.
