სალომე ზურაბიშვილმა დიდი ბრიტანეთის პარლამენტის საგარეო საქმეთა კომიტეტს მიმართა და კომიტეტის წევრების კითხვებსაც უპასუხა.
მან საქართველოში არსებულ პოლიტიკურ ვითარებაზე, საპროტესტო აქციებზე, აქციებში მონაწილეობის გამო დაპატიმრებულ ადამიანებსა და დაკავებულების მიმართ ძალადობაზე ილაპარაკა.
მე-5 პრეზიდენტმა ერთ-ერთი დეპუტატის კითხვის პასუხად თქვა, რომ „ქართული ოცნება” იმეორებს რუსეთის და ბელორუსის პრეზიდენტების მეთოდებს.
მან ყურადღება გაამახვილა რეპრესიულ საკანონმდებლო ცვლილებებზე, რომლებიც ივანიშვილის პარტიამ ბოლო რამდენიმე თვის განმავლობაში მიიღო.
„მნიშვნელოვანია, ვთქვათ, რომ ახლა საქართველოში არ არსებობს არც ერთი დამოუკიდებელი ინსტიტუტი. ყველა ერთმა პარტიამ მიითვისა. სასამართლოები, საკონსტიტუციო სასამართლო, ცენტრალური ბანკი, ყველა მარეგულირებელი კომისია, მათ შორის ერთ-ერთი მედიის მარეგულირებელია. ამ საფეხურზე ვართ.
რაც შეეხება ბელორუსს – არის ერთი მნიშვნელოვანი განსხვავება: ქართული სამოქალაქო საზოგადოება ძალიან მტკიცეა. საქართველოს მოსახლეობის მახასიათებელი განსხვავებულია. საქართველოში სამოქალაქო საზოგადოება და არასამთავრობო ორგანიზაციები ჯერაც ძალიან ცოცხალია, ისინი წინააღმდეგობას უწევენ რუსულ კანონებს”. – თქვა სალომე ზურაბიშვილმა.
მან ასევე ხაზი გაუსვა, რომ საქართველო არის ქვეყანა, რომელიც დამოკიდებული და მხარდაჭერილია ევროპელი და ამერიკელი პარტნიორების მხრიდან, ხოლო „ოცნების” ხელისუფლება სრულიად იზოლირებულია ყველა პარტნიორისგან.
სალომე ზურაბიშვილმა ასევე უპასუხა კითხვას იმის შესახებ, თუ როგორ შეიცვალა პარტია „ქართული ოცნება“ ბოლო 13 წლის განმავლობაში.
„ვიტყოდი, რომ ბოლო 13 წლის განმავლობაში არა, რადგან როდესაც ისინი 2012 წელს ხელისუფლებაში მოვიდნენ, ისინი პროგრამის შესაბამისად იქცეოდნენ, პროგრამა კი საქართველოს პროევროპული, ევროატლანტიკური გზის გაგრძელება იყო.
სწორედ ეს მმართველი პარტია იყო, რომელმაც 2018 წელს მიიღო მუხლი კონსტიტუციაში, რომ საქართველოში ყველა ინსტიტუტმა საქართველოს ევროპულ კურსს მხარი უნდა დაუჭიროს და ეს საერთო მიზნად იქცა საქართველოში მოქმედი ყველა ინსტიტუტისა და ძალისთვის.
სხვათა შორის, ეს არის მუხლი, რომელიც იმპიჩმენტის დროს მოვიხმე. ნათელია, რომ ცვლილება იყო, რომელიც დაახლოებით 2021 წლიდან დაიწყო. „ქართულმა ოცნებამ“ ძალაუფლების განმტკიცება, მედიისა და სასამართლო სისტემის შეზღუდვა დაიწყო. ეს ნელი პროცესი იყო, რომელიც უკრაინაში ომის დროს გაძლიერდა და დაიწყო პირდაპირი ანტიევროპული და ანტიდასავლური რიტორიკა.
ამბობდნენ, რომ საქართველო სანქციებს არ შეუერთდებოდა, რომ პარტნიორები საქართველოში მეორე ფრონტის გახსნას გეგმავდნენ რუსეთთან საბრძოლველად, ბრალს სდებდნენ ჩვენს ევროპელ და ამერიკელ პარტნიორებს, რომ არიან გლობალური ომის პარტიის წევრები, „ქართული ოცნება” ღიად ესხმოდა თავს აშშ-ის და ზოგიერთი ევროპული ქვეყნის ელჩებს”. – განაცხადა სალომე ზურაბიშვილმა.
კითხვაზე, რატომ მოხდა ასეთი ცვლილება, სალომე ზურაბიშვილმა თქვა, რომ „შესაძლოა, პროევროპულობა ზედაპირული იყო“.
„შეიძლება პროევროპულობა ზედაპირული იყო და ეს მისაღები იყო, სანამ გამოწვევები გაჩნდებოდა. როგორც კი გამოწვევები გაჩნდა, რუსეთმა ზეწოლის განხორციელება დაიწყო იმ ადამიანებზე, რომელთა წინააღმდეგაც რუსეთს ზეწოლის გარკვეული ინსტრუმენტები აქვს, რა თქმა უნდა, ბიძინა ივანიშვილი ერთ-ერთია, ვისზეც რუსეთს ასეთი ინსტრუმენტები აქვს. „ქართული ოცნების” პოზიცია 180 გრადუსით შეტრიალდა. ზოგჯერ „ქართული ოცნება” მეუბნება, რომ მე შევიცვალე და მე ვარ პარტიის მიზნების მოღალატე. ჩემი პასუხია – არა. მე მაშინაც პროევროპელი ვიყავი, ახლაც და მომავალშიც ვიქნები.
ქვეყანაში რუსული პროპაგანდა მნიშვნელოვან გავლენას იძენს. „გლობალური ომის პარტია”, „დიფ სთეით“, რაც ბოლო 2-3 წელია, გვესმის, ანტი-ლგბტქ პროპაგანდა – [„ოცნება”] რუსულ ან ბელორუსულ სახელმძღვანელოს მხოლოდ კანონებისთვის კი არ იყენებს, არამედ რიტორიკის კუთხითაც”. – თქვა სალომე ზურაბიშვილმა.
მან ახსენა „ოცნების” თანამშრომლობა ჩინეთთან.
„კრემლი საქართველოს ხელმძღვანელობას რეგულარულად აქებს. საქართველომ შეიცვალა საგარეო პოლიტიკური კურსიც, იმასთან ერთად, რომ საქართველოში ავტორიტარული ხდება”. – თქვა მან.
