ორგანიზაცია საფარის ხელმძღვანელმა ბაია პატარაიამ დღევანდელ ბრიფინგზე განაცხადა, რომ გაეროს ბავშვთა კომიტეტმა (CRC) საფარის არასრულწლოვანი ბენეფიციარისა და საფარის მიმართვა განიხილა, ორგანიზაციის წინააღმდეგ დაწყებული დამაზიანებელი პროცედურები შეაჩერა და ოფიციალურად ითხოვს „ქართული ოცნებისგან“ მათი უკანონო ქმედების განმარტებას.
„გუშინ შევიტყვეთ, რომ გაეროს ბავშვთა კომიტეტმა (CRC) განიხილა ჩვენი არასრულწლოვანი ბენეფიციარის მიმართვა საკუთარი უფლებების დასაცავად. კომიტეტმა დააკმაყოფილა ჩვენი მოთხოვნა და საქართველოს მოუწოდა თავი შეიკავოს ბენეფიციარის პირადი ინფორმაციის გასაჯაროების, გამოთხოვის და გადაცემისგან ნებისმიერი პირისთვის, მათ შორის ანტიკორუფციული ბიუროსთვის. ამით შეჩერდა 13 ივნისის თბილისის საქალაქო სასამართლოს ბრძანების აღსრულება.
ერთადერთი შემთხვევა, როდესაც CRC-მ გამოიყენა დროებითი ღონისძიება საქართველოში იყო ნინოწმინდის ბავშვთა სახლის ბენეფიციარების საქმე. მომხდარი ფაქტი უმნიშვნელოვანესია, რადგან იგი ქმნის სამართლებრივ პრეცედენტს: გაეროს ბავშვთა უფლებების კომიტეტის სწრაფი რეაგირება გულისხმობს საერთაშორისო სამართლებრივი მექანიზმების ამოქმედებას ქართული არასამთავრობო ორგანიზაციების წინააღმდეგ დაწყებული რეპრესიების შესაჩერებლად და, ამავდროულად, ხდება თვალსაჩინო, რომ საერთაშორისო საზოგადოება ყურადღებით აკვირდება საქართველოს მიერ ნაკისრი ვალდებულებების შესრულებას და სამოქალაქო საზოგადოების დევნაზე თვალს არ ხუჭავს.“
როგორც ბაია პატარაია განმარტავს, 2025 წლის 17 ივნისს, რაჟდენ კუპრაშვილის ბიურომ, ერთი თვის წინ მიმართა არასამთავრობო ორგანიზაციებს სასამართლო ორდერით და მათგან მოითხოვა პირადი, სენსიტიური ინფორმაციის გადაცემა.
„მურუსიძის სასამართლოს მეშვეობით, დაიწყო ანტიკონსტიტუციური პროცესების განხორციელება: ჩვენგან, უფლებადამცველი ორგანიზაციისგან, ყოველგვარი სამართლებრივი საფუძვლის გარეშე მოითხოვეს ძალადობის მსხვერპლ ქალებსა და ბავშვებზე არსებული სენსიტიური პერსონალური ინფორმაციის – მათ შორის სახელების, პირადი ნომრების, ფოტოების, საბანკო და სამედიცინო მონაცემების – გადაცემა. ჩვენ მკაფიოდ დავაფიქსირეთ ჩვენი პოზიცია და ვთქვით, რომ საფარი არ ვაპირებთ რუსული კანონებით ცხოვრებას და ჩვენი დაცვის ქვეშ მყოფი მოქალაქეების ნდობის ღალატს, თუნდაც ამას ჩვენი დევნა და დაპატიმრება მოყვეს და მივმართავთ ყველა სამართლებრივ გზას უკანონო ბრძანებების შესაჩერებლად.“
