„ქართული ოცნების“ მიერ კანონში დაგეგმილი ცვლილებებით, საკონსტიტუციო სასამართლოს იმ პარტიის აკრძალვა შეეძლება, რომლის გაცხადებული მიზანი, საქმიანობის არსი და პერსონალური შემადგენლობა სასამართლოს მიერ უკვე აკრძალული პარტიის იდენტური იქნება.
ცვლილებები „მოქალაქეთა პოლიტიკური გაერთიანებების შესახებ“ და „საკონსტიტუციო სასამართლოს შესახებ“ კანონებში შედის.
„მოქალაქეთა პოლიტიკური გაერთიანების შესახებ“ კანონის მიხედვით, საკონსტიტუციოს შეუძლია აკრძალოს პარტია, რომლის მიზანია:
- საქართველოს კონსტიტუციური წყობილების დამხობა ან ძალადობით შეცვლა
- ქვეყნის დამოუკიდებლობის ხელყოფა
- ტერიტორიული მთლიანობის დარღვევა
- ან რომელიც ეწევა ომის ან ძალადობის პროპაგანდას
- აღვივებს ეროვნულ, კუთხურ, რელიგიურ ან სოციალურ შუღლს
- ქმნის ან შექმნილი აქვს შეიარაღებული ფორმირება.
ინიციირებული ცვლილებით, საკონსტიტუციო ასევე შეუძლია, აკრძალოს პარტია, რომელიც:
- უკვე აკრძალული პარტიის იდენტური იქნება თავისი შემადგენლობით, მიზნითა და საქმიანობის არსით.
საკონსტიტუციო სასამართლოს შესახებ კანონში შესატანი ცვლილებით, სასამართლომ გადაწყვეტილება სარჩელის შეტანიდან არაუმეტეს 9 თვეში უნდა მიიღოს, ხოლო საარჩევნო პერიოდში – 14 დღეში.
კანონპროექტის განმარტებითი ბარათის მიხედვით, ზემოთ ჩამოთვლილი კრიტერიუმებით პარტიის აკრძალვა დემოკრატიულ წესწყობილებას ემსახურება.
„პოლიტიკური პარტიის შექმნა და საქმიანობა დაცულია საქართველოს კონსტიტუციით, რაც საზოგადოების პოლიტიკური ნების ჩამოყალიბების პროცესის დემოკრატიულად წარმართვისა და განვითარების ობიექტურ კონსტიტუციურ სამართლებრივ გარანტიას ქმნის, თუმცა დემოკრატიის თავდაცვისუნარიანი ბუნებიდან გამომდინარე ეს უფლებები, მიუხედავად მათი პოლიტიკურ-სამართლებრივი მნიშვნელობისა, აბსოლუტური ბუნების არ არის. სახელმწიფო უფლებამოსილია შეზღუდოს მოცემული ძირითადი უფლებები, თუ მათი გამოვლინება საფრთხეს უქმნის სახელმწიფოსა და დემოკრატიის ინტერესებს“, – ნათქვამია განმარტებით ბარათში.
27 მარტს „ოცნების” აღმასრულებელმა მდივანმა, მამუკა მდინარაძემ განაცხადა, რომ „ოცნების” პარლამენტის საგამოძიებო კომისიის საბოლოო დასკვნა „ქართულ ოცნებას” მისცემს „მყარ საფუძველს”, რათა მიმართონ საკონსტიტუციო სასამართლოს და მოითხოვონ როგორც ენმ-ის, ისე სხვა ოპოზიციური პარტიების არაკონსტიტუციურად გამოცხადება.
„ჩვენ უკვე დავაინიციირეთ კანონპროექტი, რომელიც ეხება ხსენებული პარტიების მემკვიდრე პარტიების არაკონსტიტუციურად გამოცხადებას, თუ პარტიის საქმიანობის არსი, გადაწყვეტილების მიმღებთა პერსონალური შემადგენლობა თუ საწესდებო მიზნები კოლექტიური ნაციონალური მოძრაობის საქმიანობის არსის პერსონალური შემადგენლობის თუ საწესდებო მიზნების იდენტური იქნება”. – თქვა მდინარაძემ.
