საქართველოდან რუსეთში სამხედრო და ორმაგი დანიშნულების პროდუქციის, დანადგარების, საქონლის გატანა საკანონმდებლო დონეზე უნდა აიკრძალოს, – ამის შესახებ „ევროპული საქართველოს” წევრი ოთარ კახიძე აცხადებს.
მისი თქმით, თუ ამ ტიპის საქონლის შეტანა რუსეთში აკრძალული არ გვაქვს, მაშინ არსებობს საფრთხე, რომ საქართველოს ტერიტორიის გავლით ეს საქონელი აღმოჩნდეს რუსეთის ტერიტორიაზე.
„საკითხი დგას ძალიან მარტივად. არსებობს სამხედრო და ორმაგი დანიშნულების სამხედრო და თან სამოქალაქო მოწყობილობები, ჯიპები, სხვადასხვა დანადგარები და საქონელი, რომლის შეტანაც რუსეთში აკრძალულია, მაგრამ საქართველოში შემოტანა აკრძალული არ არის, იმიტომ რომ საქართველო არ არის სანქცირებული ქვეყანა.
რაც შეეხება საქართველოდან რუსეთში რე-ექსპორტს ანუ საქართველოში შემოტანა და შემდგომ საქართველოდან რუსეთში გატანა საქართველოს ხელისუფლებას აკრძალული არ აქვს, იმიტომ რომ ისინი არაერთხელ აცხადებდნენ და იმავე პოზიციაზე არიან, რომ საქართველო არ უერთდება რუსეთის წინააღმდეგ დაწესებულ სანქციებს.
შესაბამისად ჩნდება ლოგიკური კითხვა, თუ ამ დანადგარების, ხაზს ვუსვამ ორმაგი დანიშნულების, როგორც სამხედრო, ისე სამოქალაქო დანიშნულების, რომელიც გამოიყენება რუსეთის მხრიდან როგორც აღმოჩნდა სამხედრო მიზნებით. თუ ამის შეტანა რუსეთში აკრძალული არ გვაქვს, მაშინ არსებობს საფრთხე, რომ საქართველოს ტერიტორიის გავლით ეს საქონელი აღმოჩნდეს რუსეთის ტერიტორიაზე.
ამაზე პასუხი უნდა იყოს მარტივი, რომ საქართველოდან რუსეთში სამხედრო და ორმაგი დანიშნულების პროდუქციის, დანადგარების, საქონლის გატანა, არის აკრძალული – ეს უნდა თქვას საქართველოს ხელისუფლებამ და ასახოს შესაბამის ნორმატიულ აქტში ეს აკრძალვა. უმარტივესი საკითხია და თან იძახო, რომ არ უერთდები სანქციებს და თან შეურაცხყოფა უწოდო ამ ტიპის ინფორმაციას, ეს ერთმანეთთან ლოგიკურად არ ჯდება”, – განაცხადა ოთარ კახიძე.
კახიძის კომენტარის წერილობით ვერსიას პარტიის პრესსამსახური ავრცელებს.
