ჟურნალისტ ვახო სანაიაზე სამივე თავდამსხმელი ვაჟა გიგაური, სულიკო საყევარაშვილი და გიორგი სახელაშვილი თბილისის საქალაქო სასამართლომ დამნაშავედ ცნო და 6 თვით თავისუფლების აღკვეთა მიუსაჯა.
„ფორმულას“ ცნობით, სულიკო საყევარიშვილი მოსამართლემ ცემის მუხლით უდანაშაულოდ ცნო და დისკრიმინაციული მოტივით ვახო სანაიასთვის ფიზიკური ძალადობისთვის შეუფარდა 6 თვე და საზოგადოებისთვის სასარგებლო შრომა;
ვაჟა გიგაური დამნაშავედ ცნო მოსამართლემ და ასევე მიუსაჯა 6-თვიანი პატიმრობა და 2500 ლარი ჯარიმა, გიორგი სახელაშვილს კი – 6-თვიანი პატიმრობა.
ამ სამი პირის 6-თვიანი პატიმრობის ვადა დღეს იწურება. ვახო სანაიაზე თავდასხმის შემდეგ ისინი ბრალდებულების სტატუსით წინასწარ პატიმრობაში იმყოფებოდნენ. შესაბამისად სამივე პირი დღეს გათავისუფლდება.
სამართალდამცველებმა ვახო სანაიას მიმართ, მისი პროფესიული საქმიანობის გამო განხორციელებული დევნისა და დისკრიმინაციის ნიშნით შეუწყნარებლობის მოტივით მუქარის ფაქტზე 3 პირი დააკავეს. მათ ბრალდება საქართველოს სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით, 151-ე მუხლის პირველი ნაწილით და 126-ე მუხლის პირველი ნაწილით წარედგინათ, რაც სასჯელის სახედ და ზომად 3 წლამდე თავისუფლების აღკვეთას ითვალისწინებს.
