„რუსთავი 2-ის“ დამფუძნებლების, ჯარჯი აქიმიძისა და დავით დვალის უფლებადამცველი კომპანიის „კოჟორიძის და იურისტების“ ცნობით, სასამართლოს განჩინებით ყადაღა დაედო „რუსთავი 2-ის“ უძრავ ქონებას – მიწის ნაკვეთებსა და მათზე არსებულ შენობა-ნაგებობებს.
მათივე ცნობით, ამ დრომდე დაყადაღებული იყო ტელეკომპანიის 60%-იანი წილი.
„ჩვენ ასევე მოვითხოვდით „რუსთავი 2-ის“ მოძრავი ნივთების დაყადაღებას და ქიბარ ხალვაშისთვის გარკვეული უფლებამოსილებების შეზღუდვას. ჯარჯი აქიმიძე და დავით დვალი მოითხოვდნენ ზუსტად იმ ღონისძიებებს, რაც სასამართლომ ხალვაშის მიერ 2015 წელს შეტანილ სარჩელზე გამოიყენა.
მიუხედავად ამისა, „რუსთავი 2-ის“ დამფუძნებელთა მიმართ სასამართლომ კვლავ შერჩევითად იმოქმედა და ამ ნაწილში მოთხოვნა არ დააკმაყოფილა, რაც გასაჩივრდება კანონით დადგენილი წესით. გამოვიყენებთ ყველა სამართლებრივ მექანიზმს, რომ „რუსთავი 2“ დაუბრუნდეს დამფუძნებლებს“, – აცხადებს კომპანია.
2020 წლის იანვარში სასამართლოში დავით დვალისა და ჯარჯი აქიმიძის სარჩელი პაატა კარსანიძისა და ქიბარ ხალვაშის წინააღმდეგ ისევ შეიტანეს. სასამართლომ საქმე წარმოებაში მიიღო და „რუსთავი 2-ის“ 60%-ს ყადაღა დაედო.
კერძოდ, საუბარია ჯარჯი აქიმიძისა და დავით დვალის სარჩელზე, ქიბარ ხალვაშისა და პაატა კარსანიძის მიმართ წილის ნასყიდობის ხელშეკრულების ბათილად ცნობის, საჯარო რეესტრში წილის რეგისტრაციის გაუქმებისა და შპს-ს წილის მესაკუთრედ ცნობის მოთხოვნის შესახებ.
ეს ის სარჩელია, რომელიც კახა კოჟორიძემ დვალი-აქიმიძის სახელით ერთხელ უკვე შეიტანა სასამართლოში, თუმცა პირველ ჯერზე მოსამართლემ ის განუხილველად დატოვა. ამ საქმეზე განცხადება სასამართლომ 17 იანვარს გაავრცელა. ამის შემდეგ კახა კოჟორიძის თქმით, მათ სარჩელი ხელმეორედ შეიტანეს სასამართლოში.
ტელეკომპანია „რუსთავი 2-ის“ დამფუძნებლებმა 2021 წლის 19 მარტს საქალაქო სასამართლოში დამატებითი სარჩელი შეიტანეს. სარჩელი „რუსთავი 2-ის“ გასხვისების აკრძალვაზე სასამართლოს უარს ეხება.
