„საზოგადოებრივი მაუწყებლის“ შენობის წინ გამართული აქციიდან წამოსულ მარშის მონაწილეებს უცნობი პირები თავს დაესხნენ. კადრებში ჩანს, რომ პარლამენტისკენ მიმავალ მოქალაქეებს ორი კაცი უპირისპირდება, მათგან ერთს ხელში ბასრი საგანი უჭირავს. თვითმხილველი „პუბლიკასთან“ ყვება, რომ პოლიცია უმოქმედო იყო.
„ორი ტიპი იყო გადმომხტარი, იწევდნენ ჩვენკენ, იგინებოდნენ, ჩვენები ცდილობდნენ, რომ მშვიდობიანად ჩაესვათ მანქანაში და გაეშვათ, მაგრამ გადმოხტნენ, ერთმა იარაღი გადმოიტანა, ძალიან დიდი დანა იყო, „მაჩეტე“ ალბათ, მეორე „დუბინკით“, გამოიწია ჩვენკენ, ურტყამდნენ, მერე ისევ ხალხმა ძალით ჩასვა მანქანაში და გაუშვა. […] უკან დავინახეთ, რომ შსს-ს თეთრი მანქანები რომაა, ეგ იყო, ისე გამოვიდა, რომ თითქოს ესკორტი გაუკეთა ამ მოძალადეების მანქანას“, – ყვება ნინა ჟორჟოლაძე „პუბლიკასთან“.
„პუბლიკა“ დაუკავშირდა შინაგან საქმეთა სამინისტროს. უწყებიდან პასუხის მიღების შემთხვევაში მასალა განახლდება.
