საზმაუმ კონტრაქტი არ გაუგრძელა „საზოგადოებრივი მაუწყებლის მცველების“ წევრს, ანა მეტრეველს

საზოგადოებრივმა მაუწყებელმა შრომითი კონტრაქტი არ გაუგრძელა რადიოგადაცემების „შუადღის პიკისა“ და „საღამოს პიკის“ პროდიუსერის ასისტენტს, ანა მეტრეველს. ინფორმაცია თავდაპირველად „საზოგადოებრივი მაუწყებლის მცველებმა“ გაავრცელეს.

ანა მეტრეველი „პუბლიკასთან“ საუბარში ამბობს, რომ მენეჯმენტმა გადაწყვეტილება მთავარ პროდიუსერთან შეთანხმების გარეშე მიიღეს. ის გადაწყვეტილებას უკავშირებს იმას, რომ ჩართულია საზოგადოებრივი მაუწყებლის თანამშრომლების პროტესტი და ერთ-ერთია მათ შორის, ვისაც მიაჩნია, რომ არხზე გარკვეული საკითხები ობიექტურად არ შუქდება.

„ყველაზე მნიშვნელოვანი და გასათვალისწინებელი რაც არის ამ ამბავში, ისაა, რომ ეს გადაწყვეტილება მენეჯმენტმა მიიღო ჩემ უშუალო ხელმძღვანელთან შეთანხმების გარეშე, ანუ ჩემი გადაცემის მთავარ პროდიუსერთან შეთანხმების გარეშე“, – ამბობს ის.

ხელშეკრულების არგაგრძელების ოფიციალურ მიზეზად მას ხარჯთა ოპტიმიზაცია დაუსახელეს. GPB-მ გაასაჯაროა მისი ხელფასი, რომელიც ხელზე 490 ლარს შეადგენდა.

ანა ამბობს, რომ მისმა უშუალო ხელმძღვანელმა მოითხოვა შესაბამისი დასაბუთებით მეტრეველის სამსახურში აღდგენა, მან მოთხოვნა გააკეთა არხის დირექტორის, თინა ბერძენიშვილის სახელზე, რომელმაც განცხადება განსახილველად HR-ს გადააბარა.

„გასათვალისწინებელია ის, რომ ყოველდღიური გადაცემაა, 5 სამუშაო დღე გვაქვს ეს გადაცემა და დღეში ორი ეთერი გვაქვს. […] ვგულისხმობ რადიოგადაცემას, იმიტომ, რომ ამ ეტაპზე ტელევიზიას საერთოდ არ აქვს სატელევიზიო ეთერი ფროდაქშენის განხრით, ყველა ასეთი გადაცემა გადმოგვიყვანეს რადიოში. ჩემთან ასეთი კომენტარი გააკეთა HR-მა, ოფიციალურ მიზეზად დამისახელა ხარჯთა ოპტიმიზაცია, იქიდან გამომდინარე, რომ არხს 2026 წელს არხს ისედაც ბიუჯეტიდან 13 მილიონი აკლდება და ეს ამბავი გასათვალისწინებელი აქვთ. […] აღარ მიგრძელებენ კონტრაქტს იქიდან გამომდინარე, რომ თვითონ ვერ შეასრულეს საკუთარი მოვალეობა დათქმულ ვადებში და აქედან გამომდინარე თვლიან, რომ აღარ არის ჩემი პოზიციის საჭიროება, რადიოგადაცემაზე, რომელზეც იმიტომ ვარ, რომ თვითონ ვერ მოახერხეს თავის დროზე ახალ შენობაში ჩვენი გადაყვანა“, – ამბობს ანა მეტრეველი.

მისი თქმით, დოკუმენტები მისთვის „პირველ არხს“ ჯერ არ მიუწოდებია. „პუბლიკა“ ცდილობდა საზოგადოებრივი მაუწყებლის იურისტთან დაკავშირებას, რომელმაც ჩვენ ზარებს არ უპასუხა.