ტელეწამყვანი გიორგი ნაზღაიძე სოციალურ ქსელში წერს, რომ გუშინ, 5 იანვარს, ორბელიანის მოედანთან მას და მის 2 მეგობარს 30-მდე პირი თავს დაესხა.
ნაზღაიძის თქმით, თავდამსხმელებიდან ერთ-ერთმა ორჯერ სცადა მისთვის დანის დარტყმა.
„ჩემს ორ მეგობართან ერთად წარმოუდგენელი ამბავი გადამხდა. ორბელიანის მოედნის ავტოსადგომზე დაახლოებით 30 ადამიანი თავს დაგვესხა, თავი ასეთ საფრთხეში არასოდეს მიგრძვნია, არანაირმა დალაპარაკებამ არ გაჭრა, ერთ-ერთმა თავდამსხმელმა სცადა ორჯერ დაერტყა ჩემთვის დანა, რომელიც სასწაულებრივად ავიცილე, იძულებული გავხდით ამ დაჯგუფებას გავცილებოდით და თავი გადაგვერჩინა, გავიქეცით, ისინი მოგვსდევდნენ და ქუჩის სკამებს გვესროდნენ. ხალხს ვთხოვდით დახმარებას და არავინ არ დაგვეხმარა, მხოლოდ ერთმა გოგონამ გავვიჩერა ავტომობილი და მას დაუზიანეს მანქანა, დაუჭრეს საბურავები. ახლაც ვერ მოვდივარ გონს მომხდარის გამო, მართლა სასწაულებრივად გადავრჩით, ქალაქის ცენტრში 30 შეიარაღებული მოზარდის პირისპირ მარტო აღმოვჩნდით მე და ჩემი ორი მეგობარი, რომელთაგან ერთი მძიმე ფსიქოლოგიური მდგომარეობის ქვეშ არის. ამ ადამიანებისგან და მსგავსი შემთხვევებისგან არავინ არის დაცული, ამიტომ დროულად უნდა მოხდეს დამნაშავეების გამოვლენა და პასუხი უნდა აგონ აუცილებლად!!”, – წერს გიორგი ნაზღაიძე.
როგორც „პუბლიკას” შსს-ში უთხრეს აღნიშნულ საქმეზე გამოძიება სისხლის სამართლის კოდექსის 151-ე, მუქარის მუხლითაა დაწყებული. დაკავებული არავინაა.
