შინაგან საქმეთა სამინისტროს საპატრულო პოლიციის დეპარტამენტის ცნობით, დღეს, 18 ნოემბერს, თბილისში მიმდინარე ოპოზიციური პოლიტიკური პარტიების მიერ ორგანიზებული აქციის გამო დედაქალაქის ცალკეულ უბნებში ავტოტრანსპორტის მოძრაობა დროებით შეზღუდულია.
კერძოდ, ავტომანქანების მოძრაობა სრულად აიკრძალა რესპუბლიკის მოედანსა და რუსთაველის გამზირზე (ყოფილი ფოსტის შენობიდან თავისუფლების მოედნის მიმართულებით).
ასევე, ტრანსპორტის ნაკადი ვერ გადაადგილდება რუსთაველის გამზირზე გამომავალ ვერც ერთ ქუჩაზე. შესაბამისად, ავტომანქანები ალტერნატიული მარშრუტებით მოძრაობენ.
გარდა ამისა, მელიქიშვილის გამზირიდან მომავალი ტრანსპორტის ნაკადი იმოძრავებს მხოლოდ მერაბ კოსტავას ქუჩის მიმართულებით. ავტომანქანები მეტროსადგურ „რუსთაველის“ მიმართულებით მოძრაობას ვერ შეძლებენ. ასევე, გადაკეტილია ფილარმონიიდან მეტროსადგურ „რუსთაველამდე“, მერაბ კოსტავას ქუჩასთან დამაკავშირებელი ყველა ქუჩა.
მოძრაობა შეზღუდულია გალაქტიონის ხიდიდან ელბაქიძის აღმართზე ამომსვლელი ავტომანქანებისთვის – მძღოლები მოძრაობას გააგრძელებენ დავით აღმაშენებლის გამზირის ან სანაპიროს მიმართულებით.
ტრანსპორტის ნაკადის უსაფრთხო გადაადგილებას საპატრულო პოლიციის ეკიპაჟები არეგულირებენ. შსს-ს ცნობით, აქციის დამთავრებისთანავე მოძრაობა ჩვეულ რეჟიმში აღდგება.
